Tamyz aıynda Qazaqstanda 2457 aýyl ákimi saılanady
Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR Ortalyq saılaý komıssııasynyń tóraǵasy Qýandyq Turǵanqulov málim etti.
"Bıyl tamyz aıynda Qazaqstanda barlyǵy 2457 aýyl ákimi saılanady. Bul olardyń eldegi jalpy sanynyń 91,5 paıyzyn quraıdy", - dep atap ótti tóraǵa.
Onyń aıtýynsha, qazirgi ýaqytta saılaýdyń quqyqtyq jáne qarjylyq bazasy qalyptasqan. Jergilikti bıýdjetterden saılaýdy ótkizýge 594 mln. teńge bólý josparlanýda.
"Jalpy saılaý naýqany bir aı ishinde ótetin bolady. Saılaýǵa barlyǵy 2602 depýtatty qamtıtyn 188 aýdandyq jáne qalalyq máslıhat qatysatyn bolady. Ákimdikke kandıdattar usynýdy ákim tikeleı aýyldarda, kentter men qalalarda halyqpen jeke kezdesýler ótkizý arqyly jergilikti qoǵamdastyqpen konsýltatsııalardan keıin júrgizetin bolady. Halyqtyń ákimdi saılaýǵa naqty qatysýy degenimiz osy. Oǵan qosa, halyq saılaǵan máslıhat depýtaty, tańdaýshy retinde qatysa otyryp, óz saılaýshysynyń kózqarasyn eskerýi jáne múddesin kózdeýi tıis", - dedi Q. Turǵanqulov.
Saılaýdy uıymdastyrýǵa 14 oblystyq, 28 qalalyq jáne 160 aýdandyq aýmaqtyń saılaý komıssııasy qatysady. Ortalyq saılaý komıssııasy tóraǵasynyń atap kórsetkenindeı, olardyń barlyǵy eńbekke qabiletti, tıisti daıarlyqtan ótken, ádistemelik quraldarmen, nusqaýlyqtarmen jáne qujattardyń úlgilerimen qamtamasyz etilgen.
"Qazirgi sátte saılaý komıssııalary saılaý naýqanyn ótkizýge uıymdastyrýshylyq jáne ádistemelik jaǵynan daıyn", - dep túıdi sózin Q.Turǵanqulov.