Tamyz aıynda 2 300-den astam altyn quıma satyldy – Ulttyq bank
Halyqqa tazartylǵan altyn quımalardy satý jáne satyp alý baǵdarlamasyn (budan ári – Baǵdarlama) Ulttyq bank 2017 jyly iske qosqan bolatyn. Baǵdarlama qolǵa alynǵaly jalpy salmaǵy 3,4 tonnaǵa jýyq 101 846 altyn quıma satyldy.
Altyn quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda eń kóp suranysqa ıe túri – 10 gramdyq altyn quıma. Jalpy satylǵan quımalar arasynda onyń úlesi – 26%, ıaǵnı, 26 078 dana. Odan keıin 20 gramdyq quıma suranysqa ıe – 21 823 dana (21%) satylǵan, 5 gramdyq quımadan – 21 732 dana (21%), 100 gramdyq quımadan – 20 177 dana (20%), 50 gramdyq quımadan – 12 036 dana (12%) satyldy. Altyn quımalar Almaty, Astana jáne Atyraý qalalarynda kóp satylady.
Altyn quımalar senimdi ınvestıtsııa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany birden tóleı otyryp, altyn quımalardy keri satyp ala alady.
Baǵdarlama bastalǵannan beri ekinshi deńgeıli bankter men banktik emes jekelegen pýnktter jalpy salmaǵy 395 keli 15 897 altyn quımany keri satyp alǵan, bul – jalpy satylǵan altyn quımalardyń 15,6%-y. Olar keri satyp alǵan altyn quımalardyń barlyǵy derlik Ulttyq banktiń fılıaldary arqyly halyqqa satylady.
Árbir quıma qorǵaý elementterimen qaptalǵan (quımanyń aına beti, mıkrotekst jáne jıegi bar) jáne arnaıy qorapqa salynyp shyǵady, sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qorap, sondaı-aq sapa sertıfıkaty bolyp sanalady. Sondyqtan, altyn quımany uqypty saqtap, qorabyn búldirmeýge keńes beremiz.
Qazir altyn quımalardy Halyk Bank, Eýrazııalyq Bank, Jusan Bank, TsentrKredıt Banki, sondaı-aq banktik emes jekelegen pýnkterden satyp alyp, keri satýǵa bolady.
Vıdeodan alynǵan kadr