Tamyr-tanys kómegimen qyzmette kóterilýge jol bermeý kerek – Prezıdent

NUR-SULTAN. QazAqparat – Aqordada Prezıdenttiń kadr rezervine engen jastarmen kezdesýde Memleket basshysy Qasym-Jomart Toqaev mınıstr ne ákim aýyssa kadrlyq quram da ózgeretinin synady, dep habarlaıdy QazAqparat tilshisi.

«Kórsetkishter esebinde memlekettik organdardaǵy aýyspalylyq tolyqtaı alǵanda 6-10 paıyz normasy sheginde ekenin kórsetti. Biraq mınıstr nemese ákim aýysqan kezde kadrlyq quramnyń da aıtarlyqtaı ózgeretini aıqyn. Basshy qyzmetkerlerdiń sanyna qatysty normatıvter joq. Merıtokratııa prıntsıpteri de barlyq ýaqytta saqtala bermeıdi. Áli kúnge deıin qamqorlyq jáne tanys arqyly, yqpaldy qamqorshynyń kómegimen qyzmet satysynda ilgerileý jaıttary bar», - dedi Memleket basshysy.

QR Prezıdenti mundaı jaıttardy qoǵam talqysyna shyǵarý qajettigin basa aıtty.

«Buǵan jol berýge bolmaıdy. Mundaı júıeni qoǵamdyq pikir arqyly da synı saraptamaǵa ushyratý qajet. Basqasha múmkin emes. Óıtkeni eń bastysy – nátıje. Qazaqstan qarqyndy damyp, alǵa qaraı ilgerileýi tıis», - dedi Qasym-Jomart Toqaev.