«Tamasha» teatryna - 45 jyl: Almatynyń Respýblıka saraıynda shoý-kontsert ótti
«Tamasha» - 45 jasta! Ázil teatrlarynyń atasy atanǵan oıyn-saýyq otaýynyń mereıtoıyna kórermen kóp jınaldy. Zalda ıne shanshyr jer bolmady. Sahna shymyldyǵyn Tuńǵyshbaı Jamanqulov pen Lıdııa Kádenova ashty.
— Tamasha 45 jasqa toldy. Osy aıtýly kúndi erekshe atap ótip jatyrmyz. Men úshin «Tamasha» ázil-syqaq teatrynyń orny erekshe. Ony myna kórermender de jaqsy biledi. 30 jyl osy sahnada óner kórsettim. Osy keremet teatrdyń arqasynda tanymal boldym, ónerim shyńdadym. Búgin minekeı jastarmen birge sahanaǵa shyǵyp jatyrmyz. Óte qýanyshtymyn — deıdi aktrısa.
Gúlbaýshan Tileýbekova, Danagúl Temirsultanova, Asylbek Boranbaı, Marat Kókkózov, Nurjan Tutov kórermenderge ázil-qaljyńyn aıtyp, kóńilderin bir jelpindirip tastady.
— Tamasha bolady degendi estı sala, bılet aldyq. Kesh keremet ótti. Búgin respýblıka saraıyna jınalǵan qaýym erekshe nostalgııaǵa bólendi dep oılaımyn. Akterlerdiń ónerin tamashalap otyryp, burynǵy kezder kóz aldyma elestedi. Saǵynyp qalyppyz, — deıdi almatylyq kórermen Rázııa Qydyrbaıqyzy.
Júzdegen talantyń juldyzyn jaqqan «Tamasha» ázil-syqaq teatrynyń mereıtoıyna arnalǵan keshte Roza Rymbaeva, Aıjan Nurmaǵambetova, Ulyqpan Joldasov, Tamara Asar, Tolqyn Zabırova syndy ánshiler men «Dos-Mýkasan», « Úrker» tobynyń oryndaýyndaǵy ánder keshtiń ajaryn asha tústi.
— Qazir jas ázil-syqaq teatry kóp. Biraq, tamashanyń orny bólek. Búgin bizdiń súıikti tamashamyz qaıta oraldy. Tamashanyń sahanasyn saǵyndyq. Tamasha jasaı bersin, — dedi Roza Rymbaeva.
Astarly ázil, oı salarlyq qaljyńymen kórermenniń júreginen jol taýyp, kópshiliktiń súıispenshiligine bólengen teatrdyń keshine kelgen óner súıer qaýym qımastyq kóńilmen tarqasty.
Dýmandy keshtiń televızııalyq nusqasyn aldaǵy ýaqytta «Jibek Joly»
arnasynan kórýge bolady.
Eske salaıyq, 30 qarashadan bastap Jibek Joly telearnasynan aty ańyzǵa aınalǵan «Tamasha» týraly serıal kórsetile bastady.
Serıal qazaq halqynyń eń tanymal teatrynyń tarıhynda bolǵan barlyq mańyzdy oqıǵalardy, tanymal keıipkerlermen, ıntermedııalarmen jáne mýzykamen kórsetedi.