Tamara Dúısenova Astanadaǵy jaıly mekteptiń ashylý saltanatyna qatysty
Esigin jańa ashqan mekteptiń oqýshylary, ustazdary men ata-analary aldynda sóz alǵan Tamara Dúısenova bilim kúnimen quttyqtady.
«Bizde Nazarbaev zııatkerlik mektepteri, Bilim ınnovatsııa lıtseıleri, respýblıkalyq fızıka-matematıka mektepteri sekildi úzdik bilim oshaqtary bar. Olardyń oqýshylary bilim sapasynyń óte joǵary deńgeıin kórsetip, Qazaqstandy dúnıe júzine tanytýda. Árıne, elimizdiń barsha balalary sondaı mektepterde oqýdy arman etetin. Prezıdent sizderdiń armandaryńyzdy oryndady dep aıtsam bolady. Aldaǵy jyldary mundaı mektepter barsha qazaqstandyq balalarǵa qoljetimdi bolmaq. Sizderdiń aldaryńyzda jaqsy oqyp, elimizdiń laıyqty tulǵalary bolý mindeti tur», — dedi Tamara Dúısenova.
Vıtse-premer ǵımaratty turǵyzýǵa kúsh salǵan qurylysshylarǵa alǵysyn bildirdi. Munda 4 myńnan asa bala eki aýysymda bilim alatyn bolady. Esildiń sol jaǵalaýynda ornalasqan bilim oshaǵynda 99 oqý kabıneti qarastyrylǵan, onyń ishinde 6-aýy kompıýterlik, 10 mamandandyrylǵan synyp. Odan bólek, ǵımaratta 4 sport zaly, ashana, kitaphana, psıholog bólmesi de bar. Synyptarda ınteraktıvti taqtalar ornatylǵan. Alǵashqy oqý maýsymyna aıaq basqan mektepti aralaǵan Tamara Dúısenova ustazdarǵa sáttilik tiledi.
Aıta keteıik, bıyl alǵashqy qońyraý eldegi 7859 mektepte soǵyldy. Onda jalpy sany 3,9 mln-nan asa bala bilim almaq, onyń 352 myńnan astamy bilim oshaqtary tabaldyryǵyn alǵash ret attap otyr.
Sonymen qatar búgin elimiz boıynsha 70 jańa mektep ashylǵanyn jazǵan bolatynbyz.