Tamara Dúısenova jastardy jumysqa tarta almaı otyrǵan óńirlerdi atady

ASTANA. QazAqparat – – Memleket tarapynan sýbsıdııalanatyn jumys oryndarymen qamtylǵan azamattardyń 41 paıyzyn jastar quraıdy. Bul týraly Úkimet otyrysynda QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Ulttyq jobalardyń taǵy bir baǵyty – memleket tarapynan sýbsıdııalanatyn jumys oryndaryn qurý arqyly jastardy jumyspen qamtýǵa járdemdesý. Qazir bul baǵyttaǵy josparly kórsetkish respýblıka kóleminde oryndaldy. Qazir sýbsıdııa beriletin jumys oryndaryna qamtylǵan 152 myńnan astam azamattyń 41 paıyzyn jastar qurap otyr. Mundaı jumys oryndarynyń negizgi maqsaty jastardyń naqty mashyqtar men daǵdylardy ıgerip, ári qaraı turaqty jumysqa ornalasýynda. Esepti kezeńde atalǵan kórsetkishtiń eń joǵary máni Aqmola, Jambyl, Qyzylorda jáne Almaty oblystarynyń enshisinde», - dedi ol.

Alaıda, mınıstr keıbir óńirlerdiń bul kórsetkishke qol jetkize almaı otyrǵandyǵyn aıtty.

«Mysaly Shymkent qalasynda baǵdarlamaǵa qatysqan azamattardyń ishinde tek 8,9 paıyzy, Túrkistan oblysynda 13,5 paıyzy jáne Pavlodar oblysynda 25,1 paıyzy ǵana turaqty jumysqa ornalastyrylǵan. Jastardy jumysqa ornalastyrý máselesi boıynsha da ahýal dál osyndaı sıpatta bolyp otyr. Jańa ǵana aıtylǵan 3 oblys munda da kóshtiń sońynda tur», - dedi Tamara Dúısenova.

Foto: gov.kz