Tamara Dúısenova kóshi-qon aǵynyn esepke alý úshin biryńǵaı aqparattyq júıe qurýdy usyndy

ASTANA. QazAqparat – Kóshi-qon aǵynyn esepke alý úshin biryńǵaı aqparattyq júıe qurý qajet. Mundaı usynysty Eńbek jáne halyqty áleýmettik qorǵaý mınıstri Tamara Dúısenova jasady, dep habarlaıdy QazAqparat tilshisi.

«Kóshi-qon aǵynyn esepke alý úshin biryńǵaı aqparattyq júıe qurýdy usynamyz. Bul is-shara azamattardyń memlekettik qyzmet alýyn jeńildetedi, ýaqytyn únemdeıdi, memlekettik organdarmen tikeleı baılanysyn barynsha azaıtady», - dedi búgin Úkimet otyrysynda «Ashyq Qazaqstan 500+» atty kóshi-qon saıasatynyń jańa tujyrymdamasyn tanystyrǵan mınıstr.

Tamara Dúısenovanyń atap ótýinshe, bul is-shara memleket úshin adamdardy kelý maqsaty men bolý merzimi boıynsha biryńǵaı esepke alýǵa, mıgranttar týraly derekterdi birizdi jáne qoljetimdi etýge, sondaı-aq, kóshi-qon zańnamasyn buzý faktilerin anyqtaýǵa múmkindik beredi.

Foto: primeminister.kz