Tamara Dúısenova kommýnaldyq kásiporyn jumysshylarynyń jalaqysyna qatysty pikir bildirdi

ASTANA. QazAqparat – Qazirgi kezde ákimderdiń kommýnaldyq kásiporyn jumysshylarynyń jalaqysyna ústeme aqy tóleý quqyǵy bar. Bul týraly QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Kommýnaldyq kásiporyndar jaıynda aıtsaq, biz qyrkúıek aıynda tıisti qaýlyǵa ózgeris engizdik, onda jergilikti atqarýshy organdarǵa 50%-ǵa deıin ústeme aqy tóleý quqyǵy berilgen. Sondyqtan qazir ákimderdiń mundaı quqyǵy bar. Astana qalasy bul máseleni sheshti. Osy oraıda endi ár ákim qarjylyq múmkindikterine qaraı jáne kommýnaldyq kásiporyndardaǵy jalaqy deńgeıine qaraı qarastyratyn bolady. Al aktsıonerlik qoǵamdar jalaqyny ózderi belgileıdi, ıaǵnı osyndaǵy rásimder jekemenshik sektorǵa jatady», - dedi mınıstr Májiliste tilshiler suraǵyna jaýap bere otyryp.

Budan buryn habarlanǵandaı, bıyl qazan aıynda Májilis depýtaty Baýyrjan Sartbaev kommýnaldyq qyzmet jumysshylaryna baspana satyp alý úshin paıyzy tómen nesıe berý baǵdarlamasyn iske qosýdy usyndy.