Tamara Dúısenova Qaraǵandy oblysyndaǵy bilim jáne medıtsına salasynyń qyzmetkerlerimen kezdesti
Prezıdent qoıǵan mindetter aıasynda bilim berý jáne densaýlyq saqtaý salalaryn damytý boıynsha óńir ákimi Ermaǵanbet Bólekpaevpen birge keńester ótkizildi.
Vıtse-premerdiń nazaryna «Shańyraq» bóbekjaıynda ata-analarǵa balalaryn damytý jáne tárbıeleýge kómektesetin «SabiDamu» platformasy usynyldy. Onyń negizgi mindetteri – erte damý skrınıngi jáne ózin-ózi dıagnostıkalaý.
«Biz jańa platforma quryp jatyrmyz. Bul joba balalary qandaı da bir sebeptermen balabaqshalarǵa barmaıtyn ata-analarǵa arnalǵan. Olarǵa balany úıde qalaı damytý kerektigi aıtylady. Ata-analar kez-kelgen problemany anyqtaý úshin test tapsyrady. Olardy túzetýge logopedter, defektologtar, psıhologtar kómektesedi», — dedi «Órleý» kompanııasynyń basshysy Farıda Aqsholaqova.
Platformada qazaq jáne orys tilderinde balany damytýǵa arnalǵan mýltfılmder, túrli tapsyrma bar. Mektepke daıyndyq protsesi onlaın formatta avtomattandyrylady.
Jekemenshik jáne memlekettik mektepke deıingi mekemelerdiń basshylarymen ótken keńeste vaýcherlik qarjylandyrýdy engizý boıynsha pılottyq joba tanystyryldy. Onyń basty qaǵıdasy – aqsha balamen qosa erip júredi. Bul ınnovatsııalyq júıe qarajatty paıdalanýdyń ashyqtyǵy men tıimdiligin arttyrýǵa, sondaı-aq balabaqshalar arasyndaǵy básekelestikti yntalandyrýǵa baǵyttalǵan. Pılottyq jobaǵa qatysýshy – Taraz qalasyndaǵy №9 balabaqsha meńgerýshisi Janar Ospanova júıeni engizý tájirıbesi týraly baıandady.
«Vaýcherlik ádisti engizý mektepke deıingi uıymnyń qarjylyq jaǵdaıyna áser etken joq. Kerisinshe, balabaqshaǵa taǵy 100-den astam bala keldi. Bul ádis boıynsha ata-analar balabaqshany ózderi tańdaıdy. Osylaısha, mekemeler arasyndaǵy básekelestik pen jaǵdaıdy jaqsartýǵa degen ynta arta túsedi», – dep atap ótti Janar Ospanova.
Keńeste Tamara Dúısenova bilim berý júıesindegi sabaqtastyq máselesin kóterip, balalar mektepke ótkende streske ushyramaı, oqý úderisine tez beıimdelýi úshin mektepke deıingi mekemeler men bastaýysh synyptardyń bilim berý baǵdarlamalaryn birizdendirý qajettigin atap ótti. Mańyzdy ról atqaratyn dúnıe — balanyń jeke damý kartasy, ony erte jastan bastap júrgizip, keıin bastaýysh mektepke tapsyrý qajet.
Mektep dırektorlarymen ótken jıynda bilim sapasyn arttyrý máseleleri talqylandy. «Qazaqstan halqyna» qory men bilim berýdi turaqty damytý qory birlesip júzege asyryp jatqan tirek mektepter jobasy óz tıimdiligin kórsetip otyr. Qaraǵandy oblysynda 10 mektep qamtylyp, taǵy bir bilim mekemesin qosý josparlanýda. Jobanyń maqsaty – aýyl balalaryna qaladaǵydaı bilim alýǵa múmkindik jasaý.
Memleket basshysy 2025 jyldy Jumysshy mamandyqtary jyly dep jarııalady. Qaraǵandy tehnıkalyq-qurylys kolledjinde «Besaspap» bıznes-ınkýbatory pılottyq jobasy tanystyryldy. Stýdentter óndiristik oqytý sheberlerimen birge halyqqa qyzmettiń tórt túrin: santehnıka, aǵash ustasy, jıhaz jasaý jáne elektr qyzmetterin kórsetedi. Іlkimdi bastama «Jas maman» jobasyn kommertsıalandyrýǵa yqpal etedi.
Kolledjde ınklıýzıvti bilim berý máselesine de erekshe mán beriledi. Erekshe qajettilikteri bar stýdentter úshin qolóner ortalyǵy qurylyp, olar munda sheberlikterin shyńdaı alady. Vıtse-premer bul baǵyttaǵy jumysty oń baǵalady.
Kolledj dırektorlarynyń qatysýymen ótken keńeste eńbek naryǵynda suranysqa ıe jumysshy kadrlardy daıarlaý maqsatynda tehnıkalyq jáne kásiptik bilim berýdi túrlendirý qajettigi talqylandy.
Tamara Dúısenova oblysta dári-dármekterdi tańbalaý júıesiniń qalaı júzege asyrylyp jatqanyn da tekserdi. Atalǵan júıe dáriniń óndirýshiden tutynýshyǵa deıingi jolyn baqylaýǵa múmkindik beredi, bul kontrafaktili ónimder men jetkizý tizbegindegi quqyq buzýshylyqtardyń aldyn alýǵa kómektesedi.
Vıtse-premer Qaraǵandy farmatsevtıkalyq keshenin aralap kórdi. Búgingi kúni munda 16 ataýly dárilik zat óndiriledi. Kásiporyn respýblıkadaǵy pılottyq jobaǵa qatysqan. Dárilerdiń tańbalanýy munda eki jyl boıy tájirıbeden ótti. Zańdy óndirýshiler úshin bul úlken artyqshylyq, dep atap ótti «Qaraǵandy farmatsevtıkalyq kesheni» JShS bas dırektory Sergeı Baron.
Tamara Dúısenova sondaı-aq iri dárihana qoımalaryn aralap, emhana dárihanadaǵy júıeniń qalaı jumys isteıtinin kórdi.
«Memleket basshysy bilim berý men medıtsınalyq kómek sapasyn arttyrý boıynsha birqatar tapsyrma berdi. Qaraǵandy oblysynda atalǵan baǵytta atqarylyp jatqan jumystardyń nátıjesi jemisti. Biz taǵy qaı baǵyttarda jumys isteý kerektigin talqyladyq. Densaýlyq saqtaý salasynda telemedıtsınany damytý — mańyzdy baǵyttardyń biri. Bul tek Qaraǵandy oblysynda ǵana emes, búkil el boıynsha damıtyn bolady», — dep atap ótti Tamara Dúısenova.
Osyǵan deıin Úkimettiń 2024-2029 jyldarǵa arnalǵan ekomádenıetti damytý tujyrymdamasyn bekitkenin jazdyq.