Tálipter 100-den astam áıel men er adamǵa kópshilik aldynda dúre soqqan - BUU

ASTANA. QazAqparat – BUU sarapshylary Aýǵanstandaǵy qazirgi bıliktiń jarııa túrde ólim jazasyna kesý jáne dúre soǵý jaǵdaılarynyń jıileýine alańdaýshylyq bildirdi, dep habarlaıdy QazAqparat BUU Jańalyqtar ortalyǵyna silteme jasap.

Halyqaralyq uıymnyń málimetinshe, tek sońǵy aıdyń ózinde tálipter 100-den astam áıel men er adamǵa dúre soqqan. Mundaı jaǵdaılar birneshe provıntsııada, sonyń ishinde Tahar, Logar, Lagman, Parvan jáne Kabýlda bolǵan. Urlyq úshin, «zańsyz» qarym-qatynas nemese áleýmettik minez-qulyq normalaryn buzǵany úshin «kináli» adamdardy kópshilik aldynda qamshymen sabaǵan. Stadıondarda sheneýnikter men qoǵam ókilderiniń kózinshe dúre soqqan. 2022 jyly 7 jeltoqsanda eldiń batysynda ornalasqan Farah qalasynda tálipter bir er adamdy kópshilik aldynda ólim jazasyna kesti. Bul – 2021 jyldyń tamyzynda tálipter bılikti basyp alǵannan keıingi alǵashqy jarııa túrde jasalǵan ólim jazasy. Sottalýshy bes jyl buryn taǵy bir adamdy pyshaqtap óltirgeni úshin ólim jazasyna kesilgen. Sottalǵan adamdy ólim jazasyna jábirlenýshiniń ákesi kesken.

«Biz qazirgi bılik organdaryn ólim jazasyna dereý moratorıı engizýge, azaptaýdy nemese basqa da qatygez, adamgershilikke jatpaıtyn nemese ar-namysty qorlaıtyn jazalaý túri dúre soǵýǵa jáne basqa da fızıkalyq jazalarǵa tyıym salýǵa, sondaı-aq halyqaralyq standarttarǵa sáıkes ádil sot talqylaýy men tıisti quqyqtyq protsedýraǵa kepildik berýge shaqyramyz», – delingen BUU quqyq qorǵaýshylarynyń málimdemesinde.

Onda ár adamnyń ýaqyty men turǵylyqty jerine qaramastan qadir-qasıet pen qurmetke quqyǵy bar ekendigi basa aıtylǵan.

Photo:news.un.org