Talıtsa aýylyna qaraı taraǵan órt sóndirildi – mınıstrlik
«Mıneraldandyrylǵan jolaqtar jasaý jumystary qoljetimdiligi qıyn bolýyna baılanysty toqtatyldy. Eldi mekenderge qaýip joq. Órtti sóndirý jumystary bastalǵaly beri órt oshaqtaryna áýeden 777 ret jalpy kólemi 2000 astam tonna sý tógildi. Talıtsa aýylyna qaraı taraǵan órt dala aýmaǵyna shyǵyp, sóndirildi», – dep jazylǵan habarlamada.
Tótenshe jaǵdaılar mınıstri general-maıor Syrym Sháriphanov oqıǵa ornynda órt sóndirý jumystaryn úılestirip jatyr.
Eske salaıyq, «Semeı» ormany rezervatynda órt 8 maýsym kúni shyqqan bolatyn.
Abaı oblysy ákiminiń orynbasary Dımıtrıı Garıkovtyń aıtýynsha, órt 2 ret túsken naızaǵaıdan tutanǵan.
Tilsiz jaýdy aýyzdyqtaýǵa jumyldyrylǵan 14 ormanshy qaza boldy. Barlyǵy memlekettik nagradaǵa usynyldy.
Semeı ormanyndaǵy órt faktisi boıynsha qylmystyq is qozǵaldy.
Úsh aýyldyń turǵyndary qaýipsiz jerge evakýatsııalandy.
10 maýsym kúni túste jalyn sharpyǵan aýmaq 60 myń gektardan asyp ketkeni habarlandy.
Keshe Prezıdent Qasym-Jomart Toqaev jumys saparymen Abaı oblysyna bardy.
Memleket basshysy orman alqaptaryndaǵy órt sóndirý jumystarymen tanysyp, shuǵyl áreket etý shtabynyń otyrysyn ótkizdi jáne órt kezinde qaza tapqan orman sharýashylyǵy qyzmetkerleriniń týystarymen kezdesti.
12 maýsym Semeı ormanyndaǵy alapat órtten qaza bolǵandardy aza tutý kúni bolyp jarııalandy.