Talıban aýǵan áıelderine BUU mekemelerinde jumys isteýge tyıym saldy

ASTANA.QazAqparat - Tálipter BUU mekemelerindegi aýǵan áıelderine Aýǵanstan aýmaǵynda jumys isteýge tyıym saldy. BUU ókilderi mán-jaıdy anyqtaý úshin Kabýlda bılik ókilderimen kezdespekshi, dep habarlaıdy QazAqparat DW agenttigine silteme jasap.

«Talıban» radıkaldy ıslam qozǵalysy Birikken Ulttar Uıymynda (BUU) qyzmet etetin aýǵan áıelderine jumys isteýge tyıym saldy.

«Ártúrli arnalar bizge bul tyıymnyń búkil el aýmaǵyna qatysty ekenin habarlady», - dedi BUU Bas hatshysynyń resmı ókili Stefan Dıýjarrık.

Dıýjarrık bul tyıymnyń «qısynsyz ári aqylǵa qonymsyz» ekenin aıtyp, onyń gýmanıtarlyq uıymdardyń muqtaj jandarǵa kómek kórsetýine nuqsan keltirýi múmkindigin eske saldy.

Buǵan deıin BUU-da aýǵan áıelderiniń jumysyna tyıym salý tek shyǵys Nangarhar provıntsııasyna qatysty dep habarlanǵan bolatyn.

BUU ókilderi jaǵdaıǵa qanyǵý úshin sársenbide Kabýlda bılikpen kezdesýge nıetti.

2022 jyldyń jeltoqsanynda Talıban áıelderge úkimettik emes uıymdarda jumys isteýge tyıym salǵan bolatyn. Jappaı halyqaralyq narazylyqtan keıin tyıym densaýlyq saqtaý salasynda jeńildetildi.

Biraq buǵan deıin atalǵan shekteý BUU agenttikterine qoldanylǵan joq.

2021 jyldyń tamyzynda bılikke kelgen Talıban Aýǵanstandaǵy áıelderge birqatar kemsitetin shekteýler engizdi.

Sonymen qatar, mýzyka, áleýmettik jeliler jáne beıneoıyndar zańsyz dep tanyldy.