Talǵat Musabaev Ǵarysh ınstıtýtynyń «Zerde» holdıngine berilýine nelikten qarsy

NUR-SULTAN. QazAqparat - Parlament Senatynda Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammedtiń tóraǵalyq etýimen aeroǵarysh qyzmetiniń jekelegen máseleleri boıynsha Tsıfrlyq damý, ınnovatsııalar jáne aeroǵarysh ónerkásibi mınıstrliginiń basshylyǵymen kezdesý ótti, dep habarlaıdy QazAqparat.

Kezdesýde «Ǵaryshtyq tehnıka jáne tehnologııalar ınstıtýtyn» «Zerde» ulttyq ınfokommýnıkatsııalyq holdıngi» aktsıonerlik qoǵamyna berýdiń orynsyzdyǵy týraly másele talqylandy. Senator Talǵat Musabaev osy máseleni Senat otyrysynda burynyraq ta kótergen bolatyn.

Tsıfrlyq damý, ınnovatsııalar jáne aeroǵarysh ónerkásibi mınıstriniń orynbasary Marat Nurǵojın depýtattardy qalyptasqan jaǵdaıdan habardar etti.

«Atap aıtqanda, ınstıtýt sońǵy ýaqytta kásipkerlik qyzmetti edáýir arttyrǵan bolatyn. Osylaısha, ınfokommýnıkatsııalyq tehnologııalardy damytý jobalaryna qatysty ınstıtýt jańalyqtarynyń edáýir bóligi «Yellow Pages Rule» qaǵıdattaryna qaıshy keledi. Oǵan sáıkes bıznes usynatyn qyzmetterdi memleket júzege asyrmaıdy. Osyǵan baılanysty, mınıstrlik baǵdarlamalyq qamtamasyz etý men aqparattyq júıelerdi ázirleý jónindegi ınstıtýt jarǵysynda bekitilgen ІT-mindetti alyp tastaýdy, sondaı-aq ınstıtýtty «Zerde» aktsıonerlik qoǵamyna berýdi usynady», - delingen Senat baspasóz qyzmetiniń aqparatynda.

«Instıtýtty «Zerde» holdınginiń qaramaǵyna berý ınstıtýttyń qazirgi ýaqytta bar tehnologııalyq jáne kadrlyq áleýetin joǵaltýǵa jáne sonyń saldarynan Qazaqstannyń ǵarysh salasyndaǵy bas ǵylymı-zertteý ınstıtýtynyń joıylýyna alyp kelýi múmkin», - dedi depýtat T.Musabaev. Onyń pikirinshe, ınstıtýttaǵy ǵarysh tehnıkasy men tehnologııalaryn ázirleý salasyna jetekshilik etý úshin «Zerde» holdınginde ǵarysh tehnıkasy men tehnologııalaryn ázirleý máselelerinde quzyretti ǵalymdar men mamandar joq.

Komıtet depýtattary kezdesýdi qorytyndylaı kelip, ınstıtýtty qaıta uıymdastyrý onyń kommertsııalyq qyzmeti ǵarysh salasyna zııan keltirmeı damýy tıis ekenin atap ótti. Bul máselede onyń maqsaty - ǵarysh tehnıkasy men tehnologııasynyń jasalýyn ǵylymı-tehnologııalyq qamtamasyz etý bolyp qalýy tıis, osyǵan baılanysty mınıstrlikke ınstıtýttyń qoldanystaǵy qurylymyn saqtaý usynyldy.