Talǵat Qalıev: Demokrat bolatyn adam ártúrli pikirdi tyńdaýǵa daıyn bolý kerek

NUR-SULTAN. QazAqparat – Ortalyq kommýnıkatsııalar qyzmeti» respýblıkalyq memlekettik mekemesiniń dırektory Talǵat Qalıev Ulttyq qoǵamdyq senim keńesi qurylǵan alty aıdyń jumysyn ózinshe qorytyndylady. Keńes múshesiniń aıtýynsha, jarty jyldyń ishinde aıtýly qadamdar jasalǵan, dep habarlaıdy QazAqparat tilshisi.

«Ulttyq keńestiń alty aıdaǵy jumysy týraly aıtar bolsaq, munda másele dınamıkada emes – protsestiń júrip jatqanynda. Jarty jyldyń ishinde birtalaı jumys jasaldy. Biraq qazir bizde jalpy saıası mádenıet joq dep aıtar edim. Jalpy ol – 30 jyl boıy konservatsııada bolǵan nárse. Ony ózgertý kerek. Bul - eki jaqtyń da jumysy. Máselen beıbit jıyndar týraly ártúrli pikir aıtylyp jatyr. Kóbinese ol pikirtalastarǵa kirispeımin. Biraq qarap otyrsam, pikirleri qaıshylasqan adamdar bir-birin «banǵa» kirgizip jatady. Demokrat bolam deseń ártúrli pikirlerdi tyńdaýǵa daıyn bolýyń kerek», - dedi Eýrazııalyq ıntegratsııa ınstıtýtyndaǵy «Ulttyq qoǵamdyq senim keńesi: taldamalyq zerdeleý» atty saraptamalyq baıandamanyń tanystyrylymynda.

Sarapshynyń aıtýyna qaraǵanda, Ulttyq keńes qurylǵan alty aıdyń ishinde kóp talqyǵa túsip jatatyn zańdar boıynsha edáýir progress bar.

«Onyń bir ǵana mysaly – Parlamenttik oppozıtsııa. Prezıdenttiń ózi bul qadamǵa daıyn bolyp otyr. Tıisinshe qazir bul ózgeris eshkimniń kózine kórine bermeýi múmkin. Biraq kúni erteń zań qabyldaýda nemese bıýdjetti bekitýde bul ózgeristerdiń ózektiligi ózin kórseteri anyq. Sonymen qatar beıbit jıynnyń eskertý nemese jazbasha ótinish berý tártibine qatysty ártúrli pikirler aıtylýda. Bul pikirtalastyń óziniń prıntsıptik mańyzy zor», - deıdi ol.