Talǵat Qalıev: Agrarlyq saladaǵy áleýettiń 10% da ıgere almaı otyrmyz

ASTANA. QazAqparat – Agrarlyq saladaǵy áleýetimizdiń 10 paıyzyn da ıgere almaı otyrmyz. Qoldanbaly etnosaıası zertteýler ınstıtýtynyń dırektory Talǵat Qalıev osyndaı pikir bildirdi, dep habarlaıdy QazAqparat tilshisi.

«Meniń oıymsha, agrarlyq sala óz áleýetiniń 10 paıyzyn da aqtaı almaı otyr. Janymyzda alyp naryqtar turǵanyn eskersek, solardyń áleýetin paıdalanýymyz kerek. Biraq ol úshin áýeli salany jańǵyrtýdan bastap sýarý júıelerimen qamtamasyz etý, jańa tehnologııalardy engizý sııaqty kóptegen problemalardy sheshý qajet», - dedi ol Parlament palatalarynyń birlesken otyrysynan keıin.

Onyń paıymynsha, elde jańa sý qoımalaryn salatyn ýaqyt baıaǵyda jetken.

«Búginde agralyq sektordyń ónimdiligin sýdy tıimdi paıdalaný arqyly arttyrýǵa bolady. Bul máselede eldegi sý qorynan bólek, jańa tehnologııalardy jyldamdatyp engizýdiń mańyzy da zor», - deıdi ınstıtýt basshysy.