Talǵardaǵy jasóspirimniń ólimi: polıtsııa beınebaqylaý kamerasyna qatysty málimdeme jasady

<p>QONAEV. KAZINFORM - Almaty oblysynyń Polıtsııa departamenti kameraǵa túsip qalǵan Talǵardaǵy janjaldyń beınejazbalary joıyldy degen aqparatty joqqa shyǵardy.</p>

«Áleýmettik jeliler men buqaralyq aqparat quraldarynda Talǵar aýdanyndaǵy qaıǵyly oqıǵa bolǵan jerden beınebaqylaý kameralarynyń jazbalary óshirildi degen jalǵan aqparat taraýda. Sotqa deıingi tergep-tekserý sheńberinde barlyq qolda bar beınejazbalar polıtsııa tarapynan tárkilenip, qylmystyq is materıaldaryna zattaı dálel retinde tirkelgenin habarlaımyz», - dep atap ótti vedomstvodan. 

Qazirgi ýaqytta tergeý barysynda barlyq beınejazba zerttelip, oqıǵaǵa qatysýshylardyń áreketterine quqyqtyq baǵa beriletin bolady.

«Tek resmı aqparatqa senýge shaqyramyz jáne jalǵan aqparatty taratý qylmystyq jaýapkershilikke deıin ákelýi múmkin ekenin eske salamyz. Beıneniń bar ekeni týraly aqparatty rastaý retinde postqa skrınshot qosa beriledi», - delingen habarlamada. 

Eske salaıyq, 4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz. Keıin talǵarlyqtar jasóspirim ólimine baılanysty narazylyqqa shyqty. 

Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady. 

Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy. Sondaı-aq quqyq qorǵaýshy Aıtbek Amangeldi qaza tapqan jasóspirimniń otbasyna advokattar taýyp berdi.