Talǵarda jedel járdem qyzmetkerleri júregi toqtap qalǵan zeınetkerdiń ómirin saqtap qaldy

<p>QONAEV. KAZINFORM &ndash; Almaty oblysy Talǵar aýdanynyń jedel járdem dárigerleri júregi toqtap qalǵan naýqasty ajaldan arashalap qaldy.</p>

Talǵar aýdanyndaǵy 17/20 brıgadasy shaqyrtýǵa shyqty. Naýqastyń úıine 10 mınýtta jetken jedel járdem qyzmetkerleri es-tússiz jatqan zeınetkerge birden medıtsınalyq kómek kórsetti.

«78 jastaǵy ájeı esinen tanyp qulaǵan. Men kelsem naýqastyń uly anasynyń ókpesin basyp, júrek massajyn jasap jatyr eken. Tamyrdyń soǵýyn uıqy arterııasynan ustap qarasam soqpaı tur. Dereý hattama boıynsha alǵashqy kómek kórsetýge kiristim» - deıdi 17/20 brıgadasynyń feldsheri Janar Kenjebekova. 

Medıtsınalyq sharalardan keıin aǵzanyń ómirlik fýnktsııalary qaıta qalpyna kelgen. Kóp uzamaı jasy 80-ge taıap qalǵan ájeı kózin ashyp, ózi demala bastady. 

Qosymsha taǵy 17/6 brıgadasy shaqyrtylyp, naýqas Talǵar ortalyq aýdandyq aýrýhanasyna jetkizildi. 

Buǵan deıin Almaty oblysynda jedel járdem qyzmetkerleri áıeldi úıinde bosandyryp alǵany týraly jazǵan edik.