Taldyqorǵannyń ımamdary shapandaryn sheship, júgirip jarysty

TALDYQORǴAN.QazAqparat -  Búgin Taldyqorǵanda tuńǵysh ret meshitke jınalǵan jamaǵat arasynda marafonnan jarys uıymdastyrylyp, sharaǵa ımamdar da qatysty. Taldyqorǵan óńiri boıynsha ókil ımam Ardaq Núsiphanuly bastaǵan 150-den astam turǵyn qala kóshelerimen 4 shaqyrymdaı jerdi júgirip ótti, dep habarlaıdy QazAqparat tilshisi.

Júgirýge qatysqandardyń eń jasy 18-de bolsa, eń úlkeni paıǵambar jasynda. Marafonda bas júldeni 19 jastaǵy  Erasyl Muqataı qanjyǵalap, shıpajaıǵa joldama aldy. Al shapandaryn sheship, sporttyq kıim kıip júgirgen 10-ǵa jýyq ımam jarysqa qatysýshylardyń jigerin eseledi. Iman jolynda júrgen ımamdardyń basty maqsaty jeńý emes, jamaǵatty salaýatty ómirge shaqyrý boldy.
 

Sondaı-aq, mal soıǵan qasypshylar da ózara myqtylardy anyqtady. 20 mınýttyń ishinde bir qoıdy soıyp, jiliktep, jarystyń talaptaryn múltiksiz  oryndaǵan Aıyrmas Murat eń úzdik qasapshy atandy.

«Olardyń eń áýelgi mal soıǵandaǵy tazalyǵyna, jyldamdyǵyna, qolynyń ıkemdigine úlken nazar aýdaryldy», - dedi «Iman» meshitiniń bas ımamy Ardaq Núsiphanuly. 

Sondaı-aq, qurban aıttyń alǵashqy kúninde Taldyqorǵanda  qoǵamdyq kólikter men taksı júrgizýshileri halyqqa tegin qyzmet kórsetti.