Taldyqorǵannyń áýe bazasy jańa ushaqtarmen tolyqty

TALDYQORǴAN. QazAqparat - Elimizdiń áýe qorǵanys kúshteri jańa ushaqtarmen tolyqty. Joǵary sanattaǵy «Sý-30 SM» joıǵyshtary Taldyqorǵandaǵy áýe bazasyna kelip qondy, dep habarlaıdy QazAqparat tilshisi. 

Mundaı teńdesi joq áskerı ushaqtar búginde dúnıejúzi boıynsha tek Reseı men Qazaqstannyń qarýly kúshteriniń qoldanysynda. Aýa-raıynyń ár túrli jaǵdaıynda áýedegi jáne jerdegi nysandarmen urys júrgize alatyn ámbebap tehnıka túrli synaqtan súrinbeı ótken. Saǵatyna 2500 shaqyrymǵa deıin údetip, 19 myń metr bıiktikte usha alady. 2015 jyldan beri Taldyqorǵan áýe bazasyna 6 «Sý-30 SM» ushaǵy keldi. Búgin taǵy eki ushaqpen tolyǵyp,  sany 8-ge jetti.

«Bul ushaqtar kóp fýnktsııaly, óte joǵary manevrli. Urysty kez kelgen jerde, ártúrli jaǵdaıda júrgize alady. Birneshe qarý túrimen jabdyqtalǵan. Bir mezette áýedegi jáne jerdegi qarsylasymen urys júrgizedi. Qoldaný merzimi 25 jyldan joǵary», -  deıdi Reseı ushqyshy Sergeı Manadyshev.

Áýe kemelerin Reseıdiń Irkýtsk qalasynan tájirıbeli ushqyshtar jetkizdi.