Taldyqorǵandyq stýdentter sabaqqa qatysýdy qadaǵalaıtyn qosymsha ázirledi

TALDYQORǴAN. QazAqparat – Taldyqorǵan joǵary polıtehnıkalyq kolledjiniń stýdentteri Jetisý oblysynyń sybaılas jemqorlyqqa qarsy qyzmetimen birlesip stýdentterdiń sabaqqa qatysýyn baqylaıtyn qosymsha oılap tapty. Bul týraly QazAqparat Oqý-aǵartý mınıstrligine silteme jasap habarlaıdy.

Stýdentter oqý ornynyń kireberisine qoıylǵan QR-kodtardy paıdalanyp, sabaqqa kelgenderin rastaıtyn bolady. Ol serverge avtomatty túrde jazylady. Qosymsha – sabaqqa qatysýdy esepke alý jáne baqylaýdyń tıimdi joly.

«QR-kod arqyly stýdentterdiń sabaqqa kelýin baqylaý oqý orny úshin yńǵaıly, bilim alýshylardyń da jaýapkershiligin arttyrady. Ár stýdent kelgen boıda QR-kodty telefon arqyly skanerleıdi. Onyń qaı ýaqytta kelgeni avtomatty túrde bazaǵa engiziledi. Úıde otyryp sýret arqyly skanerleý múmkin emes. Sondyqtan, sessııa kezinde ár stýdenttiń úlgerimi men sabaqqa qatysýy anyq kórinedi. Bul – stýdentter arasynda sybaılas jemqorlyqqa qarsy mádenıetti qalyptastyrýǵa jasalǵan qadamnyń biri», - deıdi kolledj pedagogi, joba jetekshisi Baqtııar Satqulov.

Joba qazirgi tańda tolyqtaı daıyn, paıdalaný úshin oqý jylynyń basynda jańadan qabyldanǵan stýdentterdiń málimetterin derekter qoryna engizý qajet. Stýdentter ázirlegen QR-kod Taldyqorǵan joǵary polıtehnıkalyq kolledjine ornatyldy. Alda oblystyń barlyq kolledj, joǵarǵy oqý oryndaryna usynylmaq.