Taldyqorǵandyq kásipker segiz balasy bar otbasyǵa páter syılady

TALDYQORǴAN. QazAqparat - Áleýmettik kásipker, «Statýs» oıyn-saýyq kesheniniń dırektory Asqar Bilálov Taldyqorǵan qalasynyń turǵyny Indıra Qarabekovaǵa úsh bólmeli páter syılady. Indıra Qarabekova - segiz balanyń anasy, dep habarlaıdy QazAqparat tilshisi.

Osyǵan deıin Asqar Bilálov osy januıaǵa kómek kórsetip kelgen, jaqynda turǵyn úı máselesin tolyq sheship bermek bolǵan.

«Qarabekovtar januıasyn biraz ýaqyttan beri bilemin. Buǵan deıin azyq-túlik sebetteri túrinde qaıyrymdylyq kórsetkenbiz. Úılerine kelgen saıyn laıyqty ómir súrýge jaǵdaı jasalmaǵanyn baıqaıtynmyn. Sondyqtan Naýryz merekesi qarsańynda osyndaı syılyq jasaýdy sheshtik», - dedi kásipker.

Úsh bólmeli páter jóndeýden ótken jáne jartylaı jıhazdalǵan. Indıra Qarabekova men balalary úshin páter tosyn syı boldy. Kópbalaly ana saıajaıda jaldamaly úıde turyp kelgen.

«Bizdiń jeke úıimiz bolady dep armandaıtynbyz. Biraq bul armanymyz osynshama jyldam oryndalady dep oılamappyn. Asqardyń jasaǵan jaqsylyǵy úshin alǵys bildiremin. Búgin bizdiń ómirimiz kúrt ózgerdi», - deıdi kópbalaly ana.

Bul kásipkerdiń alǵashqy qaıyrymdylyq sharasy emes. Osyǵan deıin kásipker turaqty túrde qalalyq qaıyrymdylyq aktsııalaryna qatysyp keledi, múmkindigi shekteýli balalardyń merekelik sharalarynyń uıymdastyrýshysy.

«Bizdiń kásipkerlerdiń izgi isteri týraly keńinen nasıhattap, olardy jastar aldynda úlgi etip otyrýymyz kerek. Qoǵamdaǵy ózekti áleýmettik jobalardy júıeli sheshý úshin Ulttyq kásipkerler palatasy «Meniń Atamekenim» jobasyn iske qosty. atamekenim.kz portalynda kómekke muqtaj jandar «Maǵan kómek kerek» bóliminde ótinim qaldyra alady, al kómek qolyn sozýǵa daıyn adamdar «Kómek berý» bólimine ótip, qoldaý kórsete alady», - dedi Almaty oblysy Kásipkerler palatasynyń adamı kapıtaldy damytý bóliminiń basshysy Almagúl Ońǵarbaeva.