Taldyqorǵandyq 60 otbasy jańa qonysqa ıe boldy

TALDYQORǴAN. QazAqparat - Búgin Taldyqorǵan qalasynda 60 otbasy úıli boldy. 7 mamyr men 9 mamyr merekeleri qarsańynda Álimjanov kóshesindegi 40 jáne 20 páterlik jalgerlik úılerdegi páterlerdiń kilti kezekte turǵan azamattarǵa berildi, - dep habarlaıdy QazAqparat tilshisi.

Óz quttyqtaý sózinde Beıbit Isabaev Taldyqorǵan qalasynda sońǵy eki jylda turǵyn úı qurylysy báseńdep, úı berý birshama kesheýildegenin aıtyp, oǵan qurylys júrgizgen merdigerlerdiń jaýapsyzdyǵy, bastaǵan qurylysty aıaqsyz qaldyrýy, koronavırýs indeti sııaqty kóptegen sebepter teris áserin tıgizgenin atap ótti. Kezeksiz úı berýdiń kóptegen faktileri oryn alǵany da tilge tıek etildi. Qazir zańsyz berilgen úılerdi sot arqyly qaıtaryp alý jumystary júrip jatyr.

«Turǵyn úımen qamtamasyz etý – halyqtyń ómir súrý sapasyn kóterýdegi eń basty máselelerdiń biri. Prezıdenttiń aldymyzǵa qoıyp otyrǵan úlken talaby da osy. Sondyqtan memlekettik baǵdarlamalardyń arqasynda biz qazir osy máselege erekshe nazar aýdaryp, qolǵa alyp otyrmyz. Qazir Taldyqorǵan qalasynda turǵyn úı kezeginde 15 myńdaı adam tur. Ádildikpen, ashyqtyqpen jumys isteı otyryp, olardy kezek reti boıynsha aldaǵy birneshe jylda baspanamen qamtý úshin qurylys qarqynyn jyldamdatyp, turǵyn úı salý kólemin arttyratyn bolamyz», - dedi B.Isabaev.

«Nurly jer» baǵdarlamasymen turǵyzylǵan bul úıge kezektegi 60 azamat qol jetkizdi. Olardyń deni kóp balaly jáne tolyq emes otbasylar, múmkindigi shekteýli jandar men osyndaı bala asyrap otyrǵan januıalar, jetim balalar, aýǵan soǵysynyń ardagerleri jáne basqa da áleýemettik osal topqa jatatyn azamattar.

Jańa baspanaǵa kirgender atynan múgedek bala asyraýshy otbasynan Aqmaral Alshynbaeva, tolyq emes otbasy sanatyndaǵy Nazgúl Beısenbekova jáne basqa da qonystoı ıeleri memleketten jasalyp otyrǵan qamqorlyq úshin rızashylyqtaryn bildirip, baspanaǵa ıe bolǵan kórshilerine izgi tilekterin jetkizdi.

Oblys ákimi Beıbit Isabaev zeınetker Shamshamaný Ábeýova men kóp balaly Beıisbekovtar shańyraǵyna kirip, dám tatyp, teledıdar syıǵa tartty.

«Otaǵasy Tileýli ekeýmiz alpys jyldan astam birge ǵumyr keship kelemiz. Aqsý aýdanynda uzaq jyl pedagogıka salasynda jumys istedim. Eńbegim eleýsiz qalǵan joq, shúkir. Bes ul, bir qyz tárbıelep ósirdik. Eki balam ózimniń jolymdy qýyp, muǵalim boldy. Búgin úlken qýanyshqa jetip otyrmyz. Osyndaı jaqsy jańalyqtar kóp bola bersin. El irgesi aman, ósip kele jatqan bala-shaǵanyń ómiri jarqyn bolsyn dep tileımin», - dedi bilim salasynda uzaq jyl eńbek etken zeınetker, «Bilim salasynyń úzdigi» Shamshamaný Ábeýova.

Jalpy búgin qoldanysqa berilgen 20 páterlik úıde 5 eki bólmeli, 15 úsh bólmeli páter bolsa, 40 páterlik úıde 10-y – bir bólmelik, 10-y eki bólmelik, 20-sy – úsh bólmelik páterler. Páterlerdiń jalpy alańy tıisinshe 1373 m2 jáne 2354,9 m2. Bul úılerdi salýǵa «Nurly jer» baǵdarlamasy boıynsha 722 mln. teńge bólinip, ıgerilgen.

Eske salsaq, oblys kóleminde bıyl 321,9 myń sharshy metr turǵyn úıdi paıdalanýǵa berý josparlanyp otyr. Sol qatarda jyl sońyna deıin Taldyqorǵan qalasynda 51 turǵyn úı qoldanysqa beriledi. Sonyń 42-si jergilikti bıýdjetten salynsa, qalǵanyn jeke kásipkerler men metsenattar óz qarajattaryna turǵyzyp jatyr. Sóıtip bir jylda 2 myńǵa jýyq taldyqorǵandyq otbasy baspanaly bolady dep kútilýde.