Taldyqorǵandaǵy jylytý qazandyqtaryn túgeldeı gaz jelisine qosý qajet - senator

TALDYQORǴAN. QazAqparat – Taldyqorǵandaǵy jylytý qazandyqtaryn gazǵa tolyq qosý máselesi kún tártibinen túspeýi tıis. Bul týraly óńirge jumys sapary barysynda Senat depýtaty Sultan Dúısembınov aıtty, dep habarlaıdy QazAqparat Palatanyń baspasóz qyzmetine silteme jasap.

Parlament Senatynyń depýtattary Sultan Dúısembınov pen Ǵalıasqar Sarybaev Jetisý oblysynda birqatar kezdesýler ótkizdi. Sapar aıasynda Balpyq bı aýylyndaǵy ortalyq jylý qazandyǵynyń jumysshylarymen kezdesip, sala mamandarymen ınjenerlik ınfraqurylymnyń ózekti máselelerin talqylady.

«Biz turǵyndardy tolǵandyratyn máselelerdi talqylaý jáne olardy utymdy sheshý joldaryn qarastyrý úshin óńirge keldik. Jergilikti atqarýshy organdardyń negizgi mindetiniń biri – jylytý maýsymynda qazandyqtardyń úzdiksiz jumysyn qamtamasyz etý. Sonymen qatar, ekologııalyq jaǵdaıdy jaqsartý máselelerin de nazardan tys qaldyrýǵa bolmaıdy. Sondyqtan, aýdandyq jylytý qazandyqtaryn gazǵa tolyq qosý máselesi kún tártibinen túspeýi tıis dep oılaımyn», - dedi Sultan Dúısembınov.

Depýtattar Taldyqorǵan qalasyndaǵy tabıǵı gazǵa qosylǵan №4 qazandyq pen №9 kómir qazandyǵynda boldy.

«Qazandyqtardy kómirdi paıdalanýdan tabıǵı gazǵa aýystyrý naqty mýltıplıkatıvtik áserge ıe bolady jáne bul óńirdiń ekologııasyna ǵana emes, áleýmettik-ekonomıkalyq damýyna da oń áser etýi múmkin. Sondyqtan, biz qala ekologııasyn jaqsartý jumysyn baıaýlatpaımyz, bul baǵyttaǵy jumystar qarqyndy júrgizilýi tıis», - dep atap ótti senator Ǵalıasqar Sarybaev.

Depýtattar óńirdegi basty kásiporyn bolyp sanalatyn qant zaýytyna bardy. Zaýyt ótken jyly 160 myń tonna qyzylsha óńdep, 20 myń tonna qant shyǵarǵan.

«Memleket basshysy 2022 jylǵy 1 qyrkúıektegi halyqqa Joldaýynda azyq-túlik qaýipsizdigin qamtamasyz etý máselesin kótergen bolatyn. Іshki naryqty qantpen qamtamasyz etý máselesi ózekti bolyp qala beredi. Bul rette óńdeý qýattaryn táýligine 4,5-5 myń tonnaǵa deıin jetkizý – ýaqyt talabyna baılanysty qajettilik, biz bárimiz osy maqsatqa jetý úshin kúsh salýymyz kerek», - dep atap ótti Ǵalıasqar Sarybaev.

Senatorlar Besqaınar aýylyndaǵy orta mektepti jóndeý jumystarynyń barysymen de tanysty. Ǵımaratty tekserý barysynda bıýdjettiń tıimdi jáne maqsatty jumsalýyn qadaǵalaýdyń mańyzdylyǵy atalyp ótti.

Sonymen qatar, №19 gýmanıtarlyq-tehnıkalyq kolledjdiń jaı-kúıimen tanysyp, oqytýshylar quramymen kezdesti. Kóksý aýdanynyń turǵyndarymen kezdesip, memlekettik baǵdarlamalardy iske asyrý máselelerin talqylady.