Taldyqorǵandaǵy jemqorlyq: Býhgalterlerimen qatar, basqalardyń da qatysy bolýy múmkin

ASTANA. QazAqparat – Ortalyq kommýnıkatsııalar qyzmetinde ótken brıfıngide Jetisý oblysynyń ákimi Beıbit Isabaev bilim salasyndaǵy jemqorlyq qylmysyna qatysy bar ekeni anyqtalǵan laýazymdy tulǵalardyń qyzmetinen ketýi múmkin ekenin málim etti, dep habarlaıdy QazAqparat tilshisi.

«Eger tergeý amaldarynyń nátıjesinde tek meniń orynbasarym emes, Taldyqorǵan qalasy ákiminiń, onyń bilim salasyndaǵy orynbasarynyń, oblystyq basqarma basshysynyń tikeleı jáne janama qatysy bar ekeni anyqtalsa, onda ony zań sheńberinde qaraýǵa ázirmin. Dál qazir meniń qolymda qyzmetinen alyp tastaýǵa negiz bolatyn naqty aıǵaqtar joq. Sondyqtan 7-8 aı buryn qyzmetine kirisken oblys ákiminiń orynbasaryn alyp tastaý týraly sheshimdi qabyldaýǵa áli erte. Ýaqyt kórsetedi, biraq shyǵýy múmkin. Mysaly, bilim bóliminiń býhgalteri, ekonomısi ne bolmasa mektep býhgalterleri emes, onyń ar jaǵynda basqa adamdardyń da famılııalary atalýy múmkin. Ol da bolýy múmkin», - dep jaýap qatty Beıbit Isabaev.

Eske salaıyq, buǵan deıin Sybaılas jemqorlyqqa qarsy qyzmet Jetisý oblysynyń prokýratýrasynyń úılestirýimen Taldyqorǵan qalasynyń bilim bóliminiń qyzmetkerlerin ustady.

Atalǵan azamattarǵa bilim berý salasynda is júzinde jumys istemeıtin úlestes tulǵalardyń paıdasyna jalaqy túrindegi óteýsiz qarjy aýdarý jolymen asa iri mólsherde bıýdjet qarajatyn júıeli negizde urlady degen aıyp taǵylyp otyr. Aldyn ala keltirilgen zalal somasy shamamen 2 mlrd teńgeni qurady.

Keıin bul iske qatysty tergeý nátıjesinde jańa derekter anyqtaldy. Atap aıtqanda, Taldyqorǵan qalasy bilim bóliminiń basshysy bıýdjet qarajatyn urlaý faktilerin jasyrǵany úshin qaramaǵyndaǵylardan 280 mln teńge para aldy degen kúdikke ilindi.