Taldyqorǵandaǵy Táýelsizdik kóshesiniń ataýy ózgerdi
Kósheniń jalpy uzyndyǵy 6,8 km, eni 16-18 m. Táýelsizdik kóshesi bastaýyn Erkin aýyldyq okrýginde ornalasqan aınalma jolynan alyp, Qadyrǵalı Jalaırı dańǵylyna deıin sozylǵan. QR Tuńǵysh Prezıdenti Nursultan Nazarbaevtyń eskertkishi, belgili qoǵam qaıratkerlerine ornatylǵan eskertkishter de ortalyq kósheniń kórkin keltirip tur. Atap aıtar bolsaq, onda qazaq bılerine arnalǵan «Úsh ata» eskertkishi, qazaqtyń belgili aqyn-jazýshysy Ǵalı Ormanovtyń bıýsti bar. Bes demalys skveri, onyń ishinde QR Memlekettik rámizderine arnalǵan keshen, 1 ortalyq alań, 1 ortalyq saıabaq, 1 akvapark jáne 1 joǵary oqý orny, 5 kolledj, 2 jalpy orta bilim beretin mektep, Almaty oblysy ákimdiginiń ǵımaraty, 2 iri memlekettik mekemeniń ákimshilik ǵımarattary, І.Jansúgirov atyndaǵy Mádenıet saraıy, Іlııas Jansúgirovtyń ádebı murajaıy, 1 balalar emhanasy, strategııalyq mańyzy joǵary nysan bolyp tabylatyn obaǵa qarsy stansa, 2 balabaqsha, 5 iri saýda orny, meıramhanalar ornalasqan.
Sonymen qatar, Táýelsizdik kóshesi turǵyndar tyǵyz ornalasqan aımaq. Atap aıtqanda, 5-ten 12 qabat aralyǵyndaǵy 51 turǵyn úı, jekemenshik 81 jer úı ornalasqan. Jalpy atalǵan kóshe boıynda 35 myńnan astam adam turady.
Almaty oblysy ákiminiń baspasóz qyzmetinen málim etkendeı, Taldyqorǵandaǵy eń kórikti kósheniń Nursultan Nazarbaevtyń esimimen atalýyna arnalǵan saltanatty shara erteń saǵat 12:00-de ótedi.
Eske salaıyq, búgin QR Prezıdenti mindetin ýaqytsha atqarýǵa kirisken Qasym-Jomart Toqaev óńirlerdegi ortalyq kóshelerge QR Tuńǵysh Prezıdenti-Elbasy Nursultan Nazarbaevtyń esimin berý usynysyn jasaǵan bolatyn.