Taldyqorǵandaǵy Naýryzda qyrǵyzstandyq trıýkshiler óner kórsetti

TALDYQORǴAN. QazAqparat -  Jetisýdyń bas qalasy Taldyqorǵanda Ulystyń uly merekesi - Naýryz meıramy sán-saltanatpen toılanyp jatyr. Bıyl «Jastar» saıabaǵyna jınalǵan halyqtyń legi erekshe kóp, dep habarlaıdy QazAqparat tilshisi.

Taldyqorǵandyqtar ásirese Qyrǵyzstannan kelgen erekshe óner ıelerin erekshe qyzyǵýshylyqpen tamashalady. 11 adamnan quralǵan toptyń baǵdarlamasynda adamnyń ústimen kólikpen júrip ótý, aýyr gir tastaryn kóterý, bıiktegi arqan jipte ártúrli trıýktar oryndaý syndy ónerler bar. Olar sondaı-aq halyqtyń arasynda túrli oıyndar uıymdastyryp, jınalǵandarǵa barynsha kóterińki kóńil-kúı sylaýǵa tyrysty. Jınalǵan jurttyń qurmet-qoshemetine bólengen 11 adamnyń barlyǵy da bir áýlettiń músheleri eken.
 

«Sizderge óner kórsetip jatqan jandar Rahmanovtar áýletiniń altynshy urpaǵy. Ózim qazir osy topqa jetekshilik etýdemin, 56 jastamyn. Bala kúnimnen bizdi osy ónerge baýlydy. Qazir bul dástúrimiz urpaqtan-urpaqqa jalǵasyp kele jatyr.  Toptyń eń kishkentaı múshesi 4 jasta, ózimniń nemerem (...). Bul joly Taldyqorǵan qalasy ákimdiginiń shaqyrtýymen arnaıy  keldik. Gonorarymyz jaqsy bolady dep úmittenemiz. Biraq qansha berse de qanaǵat tutamyz. Jalpy Taldyqorǵanǵa birinshi ret kelip turmyz. Negizi  Qazaqstannyń Almaty,  Óskemen, Shymkent syndy qalalarynda bolyp, óner kórsettik. Halyqtyń yqylasy, peıili óte jaqsy eken. Barshańyzdy Ulystyń uly meıramy - Naýryz merekesimen shyn júrekten quttyqtaımyz. Ár otbasy baqytty bolsyn», - dedi Álısher Rahmanov.
 

Qyrǵyzstannyń Osh qalasynan kelgen áýlettiń ónerine tánti bolǵan taldyqorǵandyqtar rızashylyǵyn bildirip,  arnaıy qorapqa aqshalaryn da salyp jatty.

Jalpy Naýryz merekesi toılanǵan «Jastar» parkinde saýda da qyza tústi. Máselen túrli mýltfılmniń personajdarymen sýretke túsý quny 500 teńge. Al bir stakan naýryz kóje 200-250 teńgeden saýdalandy.