Taldyqorǵandaǵy akkýmýlıator zaýyty rekordtyq ónim shyǵardy

TALDYQORǴAN. QazAqparat - Tuńǵysh Prezıdent kúni qarsańynda Taldyqorǵandaǵy qýattaǵysh batareıalar shyǵaratyn zaýyt 2 mln-shy akkýmýlıatoryn shyǵardy. Kásiporyn rekordtyq ónimin Tuńǵysh Prezıdent kúnine arnady, dep habarlaıdy QazAqparat tilshisi.

Zaýyttyń basqarý keńesiniń tóraǵasy Qýanysh Ájmaǵanbetovtyń aıtýynsha,  kásiporynnyń árbir jetistigi eldegi bereke birliktiń, Elbasynyń sarabdal saıasatynyń jemisi. 

«Qazaqstandaǵy barlyq qorǵasyndy aýystyramyz degen jospar qoıdyq. Onyń bári Prezıdenttiń qoldaýymenen, Prezıdenttiń bizge aıtqan josparymen jumys istelip jatqan saıasat», - deıdi Ájmaǵanbetov.
 

Aıta ketý kerek, Údemeli ındýstrııalyq ınnovatsııalyq baǵdarlamanyń alǵashqy kezeńinde jumys qarqynyn údetken zaýyttyń óniminiń 70 paıyzy eksporttalýda. Qazirgi tańda TMD elderinen bólek qazaqstandyq akkýmýlıatorlar Qytaı, Eýropa naryǵyna  «Uly dala eli» brendimen shyǵa bastady. Jyl saıyn ónim kólemin eselep otyrǵan zaýyt keler jyly 3 mln dana akkýmýlıator shyǵarýdy josparlaýda.