Taldyqorǵanda jylqyny zırattyń ishine soıǵan ury izdestirilýde

TALDYQORǴAN.QazAqparat - Taldyqorǵandyq Aqmaral Qııaqbaevanyń óriste júrgen jylqysyn belgisiz bireýler urlap, soıyp áketken. Turǵyn malynyń ishek-qaryny men bas-súıegin zırat ishinen taýyp alǵan, dep habarlaıdy QazAqparat tilshisi.

«Jylqym 26 qyrkúıek kúni óristen joǵaldy. Búgin tańerteń zırattyń ishinen maldyń ishek-qaryny, bas-súıegin taýyp aldyq. Zırattyń ishinde jylqymdy soıyp áketken. Polıtsııaǵa habar berdik. Olar uryny izdestirip jatyr. Biraq nátıje joq. Bul birinshi jaǵdaı emes, buǵan deıin de qoramda turǵan bıemdi qulynymen urlap ketken. Ury sol kúıi tabylmady»,- dep kúıinedi Aqmaral Qııaqbaeva.

Aqmaral Qııaqbaeva úıiniń mańaıyna beınebaqylaý kamerasyn ornatsa da urlyq tyıylmaı turǵanyn aıtady.

«Buǵan deıin qoradan joǵalatyn malymyz. Endi mine óristen urlap áketip jatyr. Men urynyń tabylatynyna senbeımin. Óıtkeni burynǵy urylar da tabylmady. Іs jabylyp qaldy», - deıdi A.Qııaqbaeva.

Aıta keteıik, osyǵan uqsas jaǵdaı Panfılov aýdanynda da bolǵan. Ol kezde barymtashylar úsh maldy Nurlan Beıseǵulovtyń qorasynan urlap, aýyldyń syrtyna baryp soıyp, ishek-qarnyn, terisin tastap ketken bolatyn.