Taldyqorǵanda jýrnalıster úıine Beısen Quranbektiń esimi berildi

TALDYQORǴAN. QazAqparat - Búgin Taldyqorǵanda belgili jýrnalıst, halqynyń aıaýly perzenti Beısen Quranbektiń esimi jýrnalıster úıine berildi, dep habarlaıdy QazAqparat tilshisi.

2014 jyly paıdalanýǵa berilgen ǵımarattyń mańdaıshasyna «Beısen Quranbek atyndaǵy jýrnalıster úıi» dep jazyldy.

Sharaǵa Jetisý oblysynyń ákimi Beıbit Isabaev, QR Parlamenti Senatynyń depýtaty Nurtóre Júsip, Májilis depýtaty Janarbek Áshimjan, televızııa ardageri Qaınar Oljaı arnaıy kelip qatysty.

Olar tarıhı kúnde Beısen Quranbektiń qazaq televızııasyna qosqan úlken úlesin tilge tıek etip, jyly estelikter aıtty.

«Aıtýǵa ońaı» baǵdarlamasymen halqynyń júreginen oryn alyp, súıikti telejúrgizýshisi, halqynyń janashyry bolǵan Beısen Quranbek osy esimi berilgen jýrnalıster úıiniń salynýyna tikeleı atsalysqan azamat.

Bul ǵımaratta «Jetisý telearnasynyń», oblystyq «Jetisý» jáne «Ognı Alataý» gazetteriniń ujymdary, sondaı-aq respýblıkalyq telearnalardyń óńirdegi tilshileri otyrady.

Qazaq televızııasynyń damýyna úlken úles qosqan Beısen Quranbek ózi júrgizgen «Aıtýǵa ońaı», «Qareket» baǵdarlamalarynda halyqtyń áleýmettik máselelerin talqylady.

Jýrnalıst júrgizgen baǵdarlamalary arqyly qıyndyqqa tap bolǵan qansha adamǵa demeý bola bildi. Júzdegen adamnyń túıtkilin sheshýge járdemdesti.

Keń peıildi júregimen, ár habaryna bar ynta-jigerimen, shynaıy súıispenshiligimen qaraǵanynyń nátıjesinde halqynyń súıikti jýrnalısine, al «Aıtýǵa ońaı» baǵdarlamasy kórermenniń súıip kóretin baǵdarlamasyna aınaldy.

Beısen Quranbek 1971 jyldyń 9 jeltoqsanynda Almaty oblysy Kerbulaq aýdany Qyzyljar aýylynda dúnıege kelgen. Ál-Farabı atyndaǵy Qazaq ulttyq ýnıversıtetin bitirgen.

Eńbek jolyn respýblıkalyq «Sport» gazetinde tilshi, jaýapty hatshy qyzmetinen bastaǵan.

Al qalǵan ǵumyryn qazaq televıdenıesimen baılanystyryp, «Rahat», «31 arna», «Habar» arnalarynda, Prezıdent teleradıokesheninde qyzmet atqarǵan.

2007-2012 jyldary Almaty oblystyq «Jetisý» telearnasynyń bas dırektory boldy.

2013-17 jyldary «Qazaqstan» telearnasyndaǵy jalpaq jurtqa tanymal «Aıtýǵa ońaı» áleýmettik-turmystyq tok-shoýynyń júrgizýshisi boldy.2017 jyldyń qyrkúıek aıynan beri ulttyq arnadaǵy «Qareket» baǵdarlamasyn júrgizdi.

2014 jyldyń qazan aıynda Almaty oblystyq «Jetisý» telearnasynyń bas dırektory bolyp qaıta taǵaıyndaldy.

Qazaqstan prezıdenti syılyǵyn 2006 jyly alǵan jáne «Qazaqstan mádenıet qaıratkeri» ataǵymen marapattalǵan.

Beısen Quranbek 2020 jyly 18 mamyrda tańerteń Taldyqorǵan qalasynda aýyr naýqastan qaıtys boldy.

Beısen Quranbektiń jarqyn beınesi áriptesteriniń júreginde máńgi saqtalady.