Taldyqorǵanda jańadan salynǵan qalashyqtyń turǵyndaryn jappaı sotqa berip jatyr

TALDYQORǴAN. QazAqparat - Taldyqorǵanda jańadan salynǵan kottedjdi qalashyqtyń turǵyndary gazǵa belshesinen qaryzǵa batyp jatyr. 250 tutynýshynyń bereshegi 22 mıllıonǵa jetken, dep habarlaıdy QazAqparat tilshisi.

Qazir eki jyl boıy úndemedik degen «QazTransGazAımaq» AQ fılıaly halyqty jappaı sotqa berip jatyr.

Al turǵyndar bolsa úı sýyq bolǵandyqtan kógildir otyn jaqtyq dep shyryldaýda.

«Mine, qalashyqtyń barlyq turǵyndaryn sotqa shaqyryp jatyr. 100, 200 myń teńgedeı báriniń qaryzy bar. Qaıdan alamyz, meniń asyraýshym joq. Úıdiń tóbesi juqa. Barlyq jylý dalaǵa ketedi. Úı sýyq bolǵandyqtan tońbas úshin gazdy aıamaı qosa beremiz. «QazTransGazdan» sotqa qaǵaz keldi. Meniki 118 myń teńge dep tur. Men ony qalaı tóleımin?», - deıdi Taldyqorǵandaǵy kottedjdi qalashyqtyń turǵyny Gúlnár Baıbatchaeva.

Aıta keteıik, Taldyqorǵanda jańadan salynǵan kottedji qalashyqqa kóship kelgen turǵyndardyń basynan daý arylmaı-aq qoıdy.

Jańa baspanaǵa kirgennen úıdiń sapasyzdyǵyna shaǵymdanyp, endi mine, kógildir otynǵa qaryzǵa battyq dep narazy.

Al turǵyndardy jappaı sotqa bergen «QazTransGazdaǵylar» qalashyqqa kógildir otyn qubyry zańsyz tartylǵan dep sheneýnikterdiń kemshiligin jaıyp saldy.

«Myna jerge gaz zańsyz kelip jatyr. Myna Qubyrlar zańdastyrylǵan joq. Myna gaz qosylǵanda bizden bir de bir ruqsat qaǵaz alǵan joq. Zańsyz qosylǵan, biz eki jyl boıy úndemedik» deıdi «QazTransGazAımaq» AQ Jetisý óndiristik fılıalynyń dırektory Ravıl Ismaılov.

Halyq erteń apatty jaǵdaı bolsa, eshkim jaýap bermeıdi dep qorqady. Al Taldyqorǵanǵa jańadan kelgen ákim «bárin zańdastyramyz» dep halyqty sendirdi.

«Myna gazdyń jobasyn jasadyq. Saraptamadan ótkizemiz de, erteń aqshasyn tólep, barlyǵyn zańdastyramyz. Gaz, trassa komıssııa sheshimimen «eksplýatatsııaǵa» ótýi kerek», - deıdi Taldyqorǵan qalasynyń ákimi Erjan Jasybaev.

Sondaı-aq, sheneýnikterdiń sózinshe, turǵyndardyń kógildir otynǵa beresheginiń bir bóligin merdiger kompanııa tóleıdi.