Taldyqorǵanda volonter stýdentterdiń forýmy ótti

TALDYQORǴAN. QazAqparat - Taldyqorǵandaǵy Іlııas Jansúgirov atyndaǵy Jetisý memlekettik ýnıversıtetinde volonter stýdentterdiń forýmy ótti. Basqosýda erikti jastardyń negizgi máseleleri talqylanyp, bıylǵy jyldyń jumys jospary pysyqtaldy, dep habarlaıdy QazAqparat tilshisi.

Qazirgi tańda ýnıversıtet qabyrǵasynda 10 volonterlyq topta 200-den astam erikti jumyldyrylǵan. Qoǵamdy jaqsartýǵa baǵyttalǵan túrli salada belsendilik tanytyp, jan-jaqty kómek kórsetýde. Máselen, aǵylshyn tilin úıretýshiler qaladaǵy «Aınalaıyn» balalar úıiniń tárbıelenýshilerine aǵylshyn tilin shyńdaýǵa kúsh salýda. Topta 30 stýdent bar. Olar kezekpen jas erekshelikterine qaraı balalarǵa dáris berip turady. Sondaı-aq, oblys ortalyǵynda turatyn áleýmettik jaǵynan az qamtylǵan otbasylardyń balalaryna da aǵylshyn tilin tegin úıretip jatyr.

Top jetekshisi Aqerke Sheńgelbaevanyń aıtýynsha 100-ge jýyq bala qamtylǵan.

«Bul bir jaǵynan bizdiń volonter retinde qoǵamǵa qosqan úlesimiz bolsa, ekinshiden, óz tájirbıemizdi shyńdaý»,— deıdi 3-kýrs stýdenti.

Taǵy bir top «Qamqor» dep atalady. Atyna zaty saı top múmkindigi shekteýli jandarǵa, jalǵyzbasty qarııalar men kópbalaly otbasylarǵa qamqorlyq jasaýmen aınalysady.

Negizinen kómir túsirý, otyn jarý, qar tazalap, muz oıý, úı jınaý sııaqty sharýalardy bitiredi.

Sondaı-aq, qalada qorshaǵan ortany qorǵaýǵa, bolashaq otan qorǵaýshylardy daıyndaýǵa, robottehnıkaǵa mashyqtanýǵa baǵyttalǵan volonterlyq toptar qurylǵan.

«Eriktilik jan qalaýy» atty stýdent volonterlarynyń alǵashqy forýmynda osy toptardyń jumys jospary naqtylanyp, baǵyttary belgilendi. Aldaǵy ýaqytta volonterlar qatary kóbeıip, basqa da salalar qamtylmaq.