Taldyqorǵanda turǵyn úıge gaz qubyryn tartý nege qymbat

TALDYQORǴAN. QazAqparat – Taldyqorǵanda jeke turǵyn úıge tabıǵı gaz qubyryn tartý quny tym qymbat. Búgin qala turǵyndarymen kezdesý ótkizgen oblys ákimi de osy máseleni synǵa aldy, dep habarlaıdy QazAqparat tilshisi.

«Taldyqorǵanǵa tabıǵı gaz 2017 jyly tartyldy. Qazir turǵyndardyń 55%-y nemese 30 myń abonent qana tabıǵı gaz qubyryna qosylǵan. Abonentterdiń tabıǵı gazǵa qosylmaı jatqanynyń sebebi, baǵasy qymbat dep oılaımyn. Gaz qostyrý quny, onyń ishinde qazandyǵy bar, barlyq shyǵyn 700 myń teńgege deıin barady. Bul – óte qymbat. Ol qazandyq pen jıyntyqtardy qospaǵanda 170 myń teńgeden aspaýy kerek», - dedi Jetisý oblysynyń ákimi Beıbit Isabaev.

Sondaı-aq, ákim jaýapty uıym ókiline qyzmet qunyn tómendetý boıynsha naqty tapsyrma berdi. Al, máseleniń qalaı sheshileri ázirge belgisiz.

«Qazir gazdy qosý quny tolyqtaı 450-650 myń teńge aralyǵynda. Bul jerde qazandyqtyń baǵasy qymbat bolyp tur – 250 myń teńgeden joǵary baǵada. Al, qubyrdy úıge kirgizý, ıaǵnı pesh pen gaz plıtaǵa qosý quny – 30 metrge deıin 150 myń teńge. Qazandyqtyń máselesin qalaı sheshemiz, bilmeımiz. Ol bizge Koreıa elinen jetkiziledi. Mundaǵy problema qazandyqtyń qymbattyǵynda bolyp tur», - dedi QazAqparat tilshisine gaz tartýmen aınalysatyn «Dat Kontenental» JShS jetekshisi Almas Smaǵulov.