Taldyqorǵanda sýretshilerdiń halyqaralyq sımpozıýmy aıaqtaldy

TALDYQORǴAN. QazAqparat - Taldyqorǵanda «Rýhanı jańǵyrý» maqalasy aıasynda «Sulýlyq álemdi qutqarady» atty sýretshilerdiń halyqaralyq sımpozıýmy ótti. Sharaǵa Ázerbaıjan, Tájikstan, Túrkııa, Qytaı, Qyrǵyz elderi men qazaqstandyq sýretshiler qatysty, dep habarlaıdy QazAqparat tilshisi.

Sımpozıýmnyń alǵashqy kúninde «Ulttyq biregeılikti saqtaý: Ulttyq kod. Ulttyq mádenıet» taqyrybynda konferentsııa uıymdastyryldy. Qylqalam sheberleri birneshe kún boıy halyqaralyq plenerge qatysyp, qalanyń kórikti jerlerin qaǵaz betine túsirdi. Oqýshylar saraıynda jas sýretshilerge sheberlik sabaqtaryn ótkizip, tájirbıelerimen bólisti.

Halyqaralyq sımpozıýmnyń jabylýynda Almaty oblysynyń mádenıet, arhıvter jáne qujattama basqarmasynyń basshysy Marlen Kólbaev sýretshilerdi quttyqtap, marapattady. Marapattaý barysynda sýretshilerge qatysqany úshin Halyqaralyq deńgeıdegi sertıfıkat pen 150 myń tengeniń syılyǵy tabystaldy.

Túrkııa Memleketiniń «TÚRKSOI» halyqaralyq uıymynyń bólim basshysy –Mehmet Sanjar Múlázimoǵly sımpozıýmǵa qatysqandarǵa Túrkııa memleketiniń atynan úlken sálem joldaı otyryp, «TÚRKSOI» uıymynyń atynan Almaty oblysynyń ákimi Amandyq Batalovqa «Alǵys hat» jáne barlyq qatysqan sýretshilerge sertıfıkattar tabystady.

Sýretshilerdiń sımpozıým barysynda salǵan týyndylary Kórkemóner galereıasynyń negizgi qorynyń eksponaty retinde saqtaýǵa alyndy. Sımpozıýmǵa barlyǵy 25 sýretshi qatysty.