Taldyqorǵanda «Shoqjuldyz izimen» atty tarıhı-tanymdyq ekspedıtsııa quryldy

TALDYQORǴAN. QazAqparat - Taldyqorǵanda «Shoqjuldyz izimen» atty tarıhı-tanymdyq ekspedıtsııa quryldy. Elbasynyń «Bolashaqqa baǵdar: rýhanı jańǵyrý» baǵdarlamasy aıasynda ekspedıtsııa músheleri áıgili ǵalym, etnograf, tarıhshy Shoqan Ýálıhanov júrip ótken jolmen saparǵa shyǵady, dep habarlaıdy QazAqparat tilshisi.

Ekspedıtsııa quramynda jetisýlyq tarıhshylar, BAQ ókilderi, «Jetisý» geografııalyq qaýymdastyq músheleri men blogerler bar. Birinshi kezekte  Semeı shaharyna baryp, qalanyń tarıhı oryndaryn aralaý josparlanǵan. Shoqan Ýálıhanovpen bul qalany qandaı oqıǵalar baılanystyryp tur degen saýaldarǵa jaýap izdep, ekspedıtsııa músheleri Aıagóz aýdanyndaǵy áıgili Qozy Kórpesh-Baıan sulý kesenesine soǵýdy josparlap otyr. Odan keıin sapar Almaty oblysynda jalǵasady dep kútilýde. Uıymdastyrýshylar keler jyly qoldaý tabylyp jatsa, Shoqannyń izi qalǵan Qyrǵyzstanǵa, Reseıdiń Omby qalasyna jáne Qytaıǵa baryp qaıtpaq. 

 «Qoldaý tabylyp jatsa, aldaǵy ýaqytta Qyrǵyzstandaǵy  Ystyqkólge saparǵa shyǵý oıymyzda bar. Sonymen qatar Reseıdegi Omby qalasynda Shoqan atamyz oqyǵan oqý ornyna, Qytaıǵa da barýdy kózdep otyrmyz», - dedi Almaty oblystyq óńirlik kommýnıkatsııalar qyzmeti basshysynyń orynbasary Rústem Qanapııanov.