Taldyqorǵanda shaǵyn fýtboldan Beısen Quranbekti eske alýǵa arnalǵan týrnır ótti

TALDYQORǴAN. QazAqparat - Taldyqorǵanda shaǵyn fýtboldan BAQ ókilderi arasynda belgili jýrnalıst, QR Mádenıet qaıratkeri Beısen Quranbekti eske alýǵa arnalǵan respýblıkalyq týrnır ótti, dep habarlaıdy QazAqparat tilshisi.

Jarystyń basty maqsaty bir jyl buryn mezgilsiz qaıtys bolǵan tanymal jýrnalıst, «Aıtýǵa ońaı», «Qareket» baǵdarlamalarynyń júrgizýshisi Beısen Quranbekti eske alyp, aqparat salasynda jumys isteıtin izbasarlary arasynda salaýatty ómir saltyn qalyptastyryp, buqaralyq sportty damytý.

Jetisý tórinde alǵash uıymdastyrylǵan jarysqa Almaty, Shymkent, Taldyqorǵan qalalary men Shyǵys Qazaqstan, Qyzylorda, Jambyl oblystarynan barlyǵy 8 komanda qatysty.

Oıynshylardyń bári buqaralyq aqparat quraldary salasynyń qyzmetkerleri. Tartysty dodada jartylaı fınalǵa Almaty men Shymkent, Taraz ben Qyzylorda komandalary shyqty.

Jarys qortyndysy boıynsha Shymkent qalasynyń komandasy úshinshi orynǵa, Taraz komandasy ekinshi orynǵa, Almaty qalasynan kelgen komanda birinshi orynǵa ıe boldy.

«Bul jarysta jeńilgen komanda joq. Eń bastysy, biz áriptesimizdiń rýhyna taǵzym etip, Beısen Quranbektiń esimin umyttyrmaýǵa, shyǵarmashylyǵyn nasıhattaýǵa bir kisideı atsalystyq. Sondyqtan bizdiń basty jeńisimiz - osy», - dedi marqumnyń dosy, «Jetisý» telearnasy dırektorynyń orynbasary Dosan Qyzaıbekuly.

Júldeli úshtikten kóringen komandalarǵa estelik kýboktar men qarjylaı syıaqy berildi. Jarystyń joǵary deńgeıde ótýine Almaty oblysynyń ákimdigi, Qazaqstan jýrnalıster odaǵy, oblystyq «Jetisý» telearnasy jáne jergilikti kásipkerler atsalysty.

Uıymdastyrýshylardyń aıtýynsha, týrnır aldaǵy ýaqytta dástúrli túrde ótip turady.