Taldyqorǵanda paıdalanýǵa berilgen 159 páterli úıde ne jaryq, ne sý joq

TALDYQORǴAN. QazAqparat - Taldyqorǵanda jańadan paıdalanýǵa berilgen kópqabatty úıde jaryq, sý, gaz joq. Turǵyndar «Nurly jol»  memlekettik baǵdarlamasymen salynǵan úıdiń sylaqtary túsip, sapasy da syn kótermeı jatqanyn aıtýda, dep habarlaıdy QazAqparat tilshisi.  

Taldyqorǵan qalasy ákimdiginiń baspasóz qyzmetinen málim etkendeı, 159 páterdiń shamamen 90-yna kiltter berilgen. Biraq sózderinshe, bul jerge 20-dan asa otbasy ǵana kóship kelgen. Al turǵyndar bolsa, esh jaǵdaı jasalmaǵan úıde amaldyń joqtyǵynan turyp jatqandaryn aıtady.

«Osy aıdyń aıaǵynda myna úıdiń aqshasy keledi. 45 myń teńge tóleýim kerek. Al jaldap turǵan páterge taǵy 50 myń teńge tóleýim kerek. Ol jaqta turyp jatqan úıimiz kógerip ketken. Bala-shaǵany qaıda apararymyzdy, ne isteıtinimizdi bilmeımiz», - deıdi taldyqorǵandyq Rýfa Toqpaqova.

Al ákimdik ókilderi Turǵyn úı qurylys jınaq banki arqyly berilgen páterlerdegi jaryq máselesi birinshi kezekte sheshiletinin jetkizdi.

«Taldyqorǵan qalasy ákiminiń orynbasary osy másele boıynsha merdiger kompanııa ókilderimen kezdesý ótkizdi. Erteń saǵat 10:00-de turǵyndarmen kezdesý bolady. Jaryq, sý, gaz máselesi  sheshiledi. Jaryq boıynsha erteńge deıin  sheshilip qalýy múmkin. Erekshe atap ótkim keledi, qonys ıelerine páterdiń  kiltterin  ákimdik emes, Turǵyn úı qurylys jınaq banki taratyp bergen», - dedi Taldyqorǵan qalasy ákiminiń baspasóz qyzmetiniń ókili Danııar Janys.   

Danııar Janys turǵyndardyń jaryqsyz qalýyna elektr togyn eseptegish quraldyń joǵalyp ketýimen túsindirdi. Al turǵyndar  jaqyn ýaqytta nátıje bolmasa sotqa shaǵym túsiretinderin aıtady.