Taldyqorǵanda «Ortaq Abaı» atty kórkem sóz oqý baıqaýy ótti

TALDYQORǴAN. QazAqparat - Taldyqorǵanda Abaıdyń 175 jyldyǵyna oraı uıymdastyrylǵan «Ortaq Abaı» atty kórkem sóz oqýdyń oblystyq baıqaýy óz máresine jetti. Baıqaýdyń ereksheligi uly aqynnyń óleńderi men qara sózderin óńirde turatyn ózge etnos ókilderi jatqa oqydy, dep habarlaıdy QazAqparat tilshisi.

«Nur Otan» partııasy Almaty oblystyq fılıaly muryndyq bolǵan sharaǵa 17 aýdan, 3 qaladan 31 úmitker keldi. Orys, ýkraın, káris, uıǵyr jáne nemis etnosynyń ókilderi ǵulamanyń óleńderin jatqa aıtyp, qara sózderin oqydy.

Baıqaýdyń basty maqsaty qazaq klassıkteriniń shyǵarmalary arqyly qatysýshylardyń qazaq tiline súıispenshiligin arttyryp, jyldam úırenip ketýine yqpal etý. Jastarǵa dana Abaıdyń ómiri men shyǵarmashylyǵyn nasıhattap, maǵynaly óleńderiniń túp maqsatyn túsindirý.

Eki kúnge sozylǵan dodada 3-shi oryndy taldyqorǵandyq Margarıta Nagaeva enshilese, 2-shi orynǵa Іle aýdanynan Anjela Krylova qanjyǵalady. 1-shi oryn Eskeldi aýdanynan kelgen Ekaterına Podgornovaǵa buıyryp, Uıǵyr aýdanynan kelgen Zýlfıra Maımelıeva baıqaýdyń bas júldesine ıe boldy. 10-synyp oqýshysy Abaıdyń 40-tan astam óleńi men on shaqty qara sózin jatqa biledi.