Taldyqorǵanda kottedj qalashyndaǵy úılerge qatysty ákimdik qyzmetkerleri qamaýǵa alyndy

ASTANA. QazAqparat – Jetisý oblysy prokýratýrasynyń arnaıy prokýrorlary memlekettik qarajatty jymqyrdy degen kúdikpen qurylys bóliminiń burynǵy basshysy, Taldyqorǵan qalasy ákimdiginde jumys istep júrgen eki qyzmetkeri, sondaı-aq tehnıkalyq qadaǵalaýdyń eki qyzmetkeri ustalyp, ýaqytsha ustaý ızolıatoryna qamaldy.

Bul týraly QazAqparat QR Bas prokýratýrasynyń baspasóz qyzmetine silteme jasap habarlaıdy.

Olarǵa Taldyqorǵan qalasynda kottedj qalashyǵyn salý kezinde bıýdjet qarajatyn asa iri mólsherde urlady degen kúdik keltirilip otyr.

Jumystardy naqty oryndamaı, olar merdigerge 500 mln. teńgeden astam somaǵa bıýdjet qarajatyn tólegeni anyqtaldy.

Osy fakt boıynsha QK-niń 189-baby, 2-tarmaǵynyń 4-bóligi (senip tapsyrylǵan múlikti ıemdený nemese ysyrap etý) boıynsha sotqa deıingi tergep-tekserý júrgizilýde.

Osy baptyń sanktsııasy 12 jylǵa deıin bas bostandyǵynan aıyrýdy qarastyrady.

«Qylmystyq-protsessýaldyq kodekstiń 201-babyna sáıkes sotqa deıingi tergep-tekserýdiń qalǵan derekteri jarııa etýge jatpaıdy»,-delingen Bas prokýratýranyń habarlamasynda.