Taldyqorǵanda kommýnıster balalar quqyǵyn qorǵaýdy qolǵa almaq

TALDYQORǴAN. QazAqparat - Qazaqstan kommýnıstik halyq partııasy Almaty oblystyq fılıalynyń ókilderi balalardy turmystyq zorlyq-zombylyq pen kıberbýllıngten qorǵaý taqyrybynda dóńgelek ústel uıymdastyrdy. Sharaǵa bilim departamenti, ıývınaldy polıtsııa ókilderi, qoǵamdyq uıymdar men aýlalyq klýb jetekshileri qatysty, dep habarlaıdy QazAqparat tilshisi.

Qazaqstannyń kommýnıstik halyq partııasynyń málimetinshe elimizde pandemııa saldarynan turmystyq zorlyq-zombylyq 30 paıyzǵa artqan.

Sondaı-aq balalar men jasóspirimderge áleýmettik jeliler arqyly «kıberbýllıng» shabýyldary jıilep barady.

Osy derekterdi alǵa tartqan partııa el ishinde saýalnama júrgizip, qazirgi qoldanystaǵy zańnamalarǵa ózgerister men tolyqtyrýlar engizý úshin usynys jınaýǵa kiristi.

«Keıbir zańnama batysqa elikteýmen engizilgen. Bul bizdiń memleketimizdiń kózqarasyna qaıshy eken. Sondyqtan sonyń barlyǵyn qortyndylap, durys jolyn tapsaq dep oılaımyn», - deıdi partııanyń Almaty oblystyq fılıalynyń birinshi hatshysy Sáýle Bıǵarova.

Dóńgelek ústelde kóterilgen máselelerdiń bári jınaqtalyp, partııanyń Parlamenttegi ókilderine jóneltilmek.