Taldyqorǵanda komıkster festıvali ótti
Sharaǵa komıks qurastyrýshylar men qalanyń eń jas turǵyndary qatysty, dep habarlaıdy QazAqparat tilshisi.
Sharanyń maqsaty qazaqsha komıkster arqyly jastardy kitap oqýǵa tárbıelep, qazaq batyrlaryna degen súıispenshiligin oıatý, jańa keıipkerlerdi dáripteý arqyly otandyq komıksterdi damytý. Sebebi komıks janry kıno men kitap ortasyndaǵy dáneker. Túrli-tústi sýretter men ondaǵy áńgimeler balalardyń oqıǵa jelisin jyldam qabyldap, tez túsinýine múmkindik beredi. Sondaı-aq komıkster arqyly kásip júrgizýge de bolady. Belgili bir keıipkerdiń oıynshyqtaryn shyǵaryp, beınesin oqý quraldary men kıim-keshek jáne ydys-aıaqqa salýǵa bolady, deıdi uıymdastyrýshylar.
Festıval aıasynda kompıýterlik oıyndardan jarys ótip, oqýshylar túrli-tústi tekshe jınaýdan ózara saıysty. Al komıks shyǵarýshylar ózderiniń týyndylaryn balalarǵa tegin usyndy. Sondaı-aq qonaqtar túrli keıipkerlermen sýretke túsip, ózderi de ertegi keıipkerleriniń kıimin kıip keldi. Sharaǵa tájirbıesimen bólisýge sheteldik mamandar kelip, 13 kompanııa óz ónimderin usyndy.