Taldyqorǵanda halyqaralyq standarttaǵy júzý basseıni salyndy

TALDYQORǴAN. QazAqparat - Taldyqorǵan qalasynda 570 orynǵa eseptelgen Olımpıadalyq júzý basseıni ashyldy. Nysan barlyq halyqaralyq standarttarǵa sáıkes keledi. Sol sebepti munda eń joǵary deńgeıdegi jarystardy ótkizýge bolady, dep habarlaıdy QazAqparat tilshisi.

Zamanaýı júzý basseıni 3,8 ga jerdi alyp jatyr. Jalpy aýdany 13 myń sharshy metrden asady. 570 orynǵa arnalǵan júzý basseıniniń qurylysyna 11,4 mlrd teńgeden astam qarajat jumsalǵan. Nysannyń syrtqy keıpi teńizde júzip júrgen alyp balyqty elestetedi. Munda 3 basseın bar, sonyń ishinde eń úlkeniniń uzyndyǵy – 52 metr, eni 25 metr. Bul ǵımaratta nıet bildirgender sý doby, sýǵa sekirý, akvaaerobıka sııaqty júzýdyń barlyq túrinen jattyǵa alady.

Basseın jyl boıy túrli deńgeıdegi sporttyq jarystar ótkizýge, sol sııaqty azamattardy salamatty ómir saltyna beıimdeýge, balalardy júzýge úıretýge arnalǵan. Múmkindigi shekteýli jandarǵa da barlyq jaǵdaı jasalǵan. Aldaǵy ýaqytta trıatlon, baıdarkada esý, kanoe jáne basqa da bólimder ashý josparlanǵan. Basseın arqyly Taldyqorǵannyń bolashaqta sý sportynyń ortalyǵy bolýyna múmkindigi bar.

«Elbasy men Prezıdenttiń elimizdegi sportqa kóńil bólý týraly tapsyrmalaryna sáıkes búginde Almaty oblysynda 13 dene shynyqtyrý saýyqtyrý kesheni jumys istep tur. Búgin, mine, álemdik standartqa saı, Ortalyq Azııada teńdesi joq júzý basseıni saltanatty túrde ashylýda. Bul nysan óskeleń urpaqty sportqa baýlýǵa úlken serpin beredi jáne osy jerden elimizdiń dańqyn shyǵaratyn myqty sportshylar tárbıelenip shyǵady dep senemin. Táýelsizdiktiń 30 jyldyq merekesine oraı iske qosylyp otyrǵan júzý basseıni qutty bolsyn!», - dedi oblys ákimi Amandyq Batalov.

Munan soń bokstan Sıdneı Olımpıadasynyń chempıony Ermahan Ybraıymov sóz alyp, búgingi ashylyp otyrǵan olımpıadalyq standarttaǵy júzý basseıni Almaty oblysy úshin ǵana emes, tutas Qazaqstan úshin aıtýly oqıǵa dep esepteıtinin aıtty. «Óıtkeni munda bizdiń sportshylardyń álem chempıondary, Olıpıada chempıondary bolýyna barlyq jaǵdaı jasalǵan», - dedi ol.

Qazaqstan Respýblıkasynyń júzýden birneshe dúrkin chempıony Marııa Fedotova da búgingi kúni óńir sportshylary Tokıo Olımpıadasyna 11 joldama jeńip alǵanyn tilge tıek etip, balalar men jasóspirimderdi sportqa baýlýǵa jasalǵan zor múmkindikter úshin el aǵalaryna alǵysyn bildirdi jáne halyqaralyq jarystarda eldiń týyn kókte jelbiretýge bar kúsh-jigerin jumsaıtynyn aıtty.