Taldyqorǵanda halyqaralyq etno-festıval ótedi

TALDYQORǴAN. QazAqparat - Taldyqorǵanda 6 qazanda halyqaralyq etno-festıval ótkiziledi. «Máńgilik eldiń máńgilik saryny» atty sharaǵa Ózbekstan, Qyrǵyzstan, Túrikmenstan, Tatarstan, Túrkııa, Týva, ıAkýtııa syndy memleketterdiń óner maıtalmandary qatysady dep kútilýde. Aýqymdy shara Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda uıymdastyrylýda, dep habarlaıdy QazAqparat tilshisi.

Saıys erejesine sáıkes, qatysýshylar 20 jastan asqan bolýy tıis. Ansambl quramy 8-10 adamnan aspaýy shart. Ujym músheleri arnaıy ulttyq kıimde óner kórsetýi kerek. Ansambldiń jáne jeke oryndaýshynyń repertýarynda qazaq kompozıtorlarynyń 1 shyǵarmasy (kúı, án) oryndalýy shart. Qatysýshylar festıvalge 5 qazannan bastap keledi. Taldyqorǵan qalasynyń birneshe jerinde kontserttik baǵdarlamalar qoıylady. Tekeli qalasyndaǵy demalys aımaǵynda oryndaýshylardyń sheberlik sabaqtary uıymdastyrylady. 7 qazanda Gala-kontsert uıymdastyrylyp, qatysýshylar baǵaly syılyqtarmen, dıplomdarmen marapattalady.

Aıta ketý kerek, Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda oblysta kóptegen ıgi ister júzege asýda. Almaty oblysynyń mádenıet, arhıvter jáne qujattama basqarmasy osy baǵdarlama negizinde 28 aýqymdy joba usynyp otyr. Sol iri jobalardyń biri - halyqaralyq «Máńgilik eldiń máńgilik saryny» etno-festıvali.

«Shara maqsaty - túrki tildi halyqtardyń dástúrli mýzykalyq murasyn kópshilik qaýymǵa nasıhattaý, dástúrli ónerge bet burǵan óner ıelerin yntalandyryp, qurmet kórsetý. Qazaqtyń dástúrli mýzykasy arqyly álemdik órkenıetke qosqan úlesin keńinen nasıhattaý, ulttyq, folklorlyq ónerdiń damýyna yqpal jasaý, folklorlyq ansamblderdiń repertýarlaryn damytý, ózara shyǵarmashylyq baılanys ornatýyna yqpal jasaý, olarǵa jan-jaqty qoldaý kórsetý», - deıdi uıymdastyrýshylar.

Festıvalge «TURKSOY» Túrki mádenıetin jáne ónerin damytý halyqaralyq uıymy qoldaý kórsetýde.