Taldyqorǵanda eki aı jalaqy almaǵan avtobýs júrgizýshileri jumysqa shyqpady
Al turǵyndardy tasymaldaýmen aınalysatyn avtobýs kompanııalarynyń qojaıyndary jalaqynyń túspeýin sýbsıdııanyń tólenbeýimen baılanystyrady.
Búgin tańerteń saǵat 08:30 da ákimdik ókilderi avtobýs júrgizýshilerimen kezdesken.
Kelissózden keıin 10 baǵyt boıynsha shyqpaǵan avtobýs júrgizýshileri jumysyna qaıta kiristi.
«Al tasymalmen aınalysatyn kompanııa ókilderi sýbsıdııa bólinbegen soń jalaqy keshikkenin aıtyp túsindirdi. Máselen, 2022 jyly bıýdjetten sýbsıdııa boıynsha 880 mln teńge qarjy suralǵan. Biraq tek 430 mln teńge bólingen. Ol qarajat jetpegen. Endi bıýdjetten taǵy 450 mln teńge suralǵan. Biraq qalalyq máslıhat ol somany maquldamaǵan. Suralǵan qarjy bólingende jyl sońyna deıin qajetti sýbsıdııa beriledi»,- dep túsindirdi Taldyqorǵan qalasy ákimi baspasóz qyzmetiniń ókili Mádı Shákenov QazAqparat tilshisine.
Jalpy, jyl basynan beri tasymalmen aınalysatyn «Transtal» JShS-ne - 162, 63 mln teńge, «Saıman» JShS - 55,55 mln teńge, «Taldyqorǵan Taksopark» JShS - 45,15 mln teńge bólingen.