Taldyqorǵanda buryn sottalǵan azamat balalardy tonady degen kúdikpen ustaldy
21:42, 10 Mamyr 2023
TALDYQORǴAN. QazAqparat - Taldyqorǵanda buryn sottalǵan azamat balalardy tonady degen kúdikpen ustaldy, dep habarlaıdy QazAqparat tilshisi.
Taldyqorǵan qalasynda kámeletke tolmaǵan balany tonady degen kúdikpen 33 jastaǵy er adam ustaldy. Atalǵan fakti boıynsha jasóspirim balanyń anasy aryz jazdy. Ol 17 jastaǵy ulyn uryp-soǵyp, uıaly telefonyn tartyp alǵan belgisiz tulǵany qylmystyq jaýapkershilikke tartýdy talap etti.
«Jedel-izdestirý is-sharalary barysynda tártip saqshylary kúdiktini anyqtap, ustap, qalalyq polıtsııaǵa jetkizdi. Ustalǵan azamat buryn osyǵan uqsas quqyq buzýshylyq jasaǵany úshin sottalǵan eresek adam bolyp shyqty. Іs boıynsha tergeý amaldary QR QK-niń 191-babyna sáıkes (Tonaý) júrgizilýde»,- delingen Jetisý oblystyq polıtsııa departamenti baspasóz qyzmetiniń habarlamasynda.