Taldyqorǵanda bir aıdan beri 8 aılyq sábıin izdep júrgen áıel balasymen qaýyshty

TALDYQORǴAN. QazAqparat - Jetisý oblysynda emshektegi balasyn joǵaltyp alǵan kelinshek sábıin tapty. Ol osynyń aldynda 8 aılyq nárestesin kúıeýi áketip qalǵanyn málimdegen, dep habarlaıdy QazAqparat.

Bul jaıynda NeMolchı qorynyń jazbasynan belgili bolǵan edi.

Qor basshysynyń aıtýynsha, osydan biraz ýaqyt buryn segiz aılyq balanyń ákesi enesin soqqyǵa jyqqany úshin 15 táýlikke qamalǵan.

Sol janjaldan soń áıel balasyn tappaı qalǵan. Ony ákesiniń týystary jasyryp ustap otyrýy múmkin.

Osydan keıin Jetisý oblysynyń polıtseıleri shuǵyl náresteni izdeýge kiristi.

«Bala Taldyqorǵan qalasynda jeke sektorda turatyn ákesiniń týystarynan tabyldy. Qazirgi ýaqytta náreste anasynyń janynda, óz kezeginde ol qalalyq polıtsııa qyzmetkerlerine búldirshinin izdeýge kómekteskeni úshin alǵys aıtty» delingen polıtsııa habarlamasynda.

Náresteniń bolashaq taǵdyryn qorǵanshylyq jáne sot organdary ókilderi sheshedi.

Balanyń ákesi sot sheshimimen ákimshilik qamaýda otyr.