Taldyqorǵanda baspana kezeginde turǵan 55 otbasyna kottedj úı berildi

TALDYQORǴAN. QazAqparat - Táýelsizdik kúni Taldyqorǵanda 55 otbasyna kottedj úı berildi. Qonys ıelerine baspana kiltin Almaty oblysynyń ákimi Amandyq Batalov tabystady, dep habarlaıdy QazAqparat tilshisi.

Ár kottedj úıdiń aýlasy - 10 sotyq. Al ár baspananyń kólemi - 90 sharshy metr.

«Tolyq emes otbasy retinde baspana kezeginde 15 jyl turyp, búgin arman bolǵan úıimizge qol jetkizdik. Ózimniń 3 balam, segiz nemerem bar. Táýelsizdik kúninde baspanaly bolyp jatqan barsha halyqty qonys toıymen quttyqtaımyn», - deıdi qýanyshymen bólisken Raýza Qazaqbaıqyzy.

Taldyqorǵan qalalyq ákimdiginiń málimetinshe, búgin berilgen kottedjdi úılerdiń barlyǵy - jalǵa beriletin baspana. Jáne bul úıler jekeshelendirilmeıdi.

«Osy kottedjdi qalashyqtyń aýmaǵynda 900 oryndyq mektep salynady. Qazir mekteptiń jobasyn bastadyq. Balabaqsha salamyz. Áleýmettik nysandardyń barlyǵy bolady. Osynyń barlyǵy - Táýelsizdigimizdiń, memlekettik baǵdarlamalardyń jemisi dep bilemin», - dedi qonys ıelerin quttyqtaǵan Almaty oblysynyń ákimi Amandyq Batalov.