Taldyqorǵanda «Astana» dańǵyly ashyldy

TALDYQORǴAN. QazAqparat - Astananyń 20 jyldyǵyna oraı Almaty oblysynyń ortalyǵy Taldyqorǵan qalasynda Astana dańǵyly ashyldy. Sonymen qatar osy kúni asa kórnekti qazaq tarıhshysy Qadyrǵalı Jalaırıdiń, Eńbek erleri Báıken Áshimov pen Zylıha Tamshybaevnyń atyna kósheler berildi, - dep habarlaıdy QazAqparat tilshisi.

Saltanatty rásimder oblys ákiminiń qatysýymen ótti. Aldymen Qadyrǵalı Jalaırı dańǵylyn ashýdan bastalǵan sharada Amandyq Batalov óńir zııalylarymen jáne ardagerler qaýymymen birge qalanyń jańa shaǵyn aýdanynan B. Áshimov pen Z. Tamshybaevanyń atyna berilgen kóshelerge jáne qalaǵa kireberiste jańadan ornatylǵan arkaǵa da atbasyn burdy. Sondaı-aq Astana dańǵylynyń ashylý saltanatyna qatysyp, dańǵyldyń lentasyn ardagerlermen jáne Astanamen qurdas jastarmen birge qıdy. Óz quttyqtaýynda oblys ákimi Astana kúnin merekeleýdiń mańyzyna qysqasha toqtaldy.

«Osyndaı ataýly mereke qarsańynda oblys aýmaǵynda kóptegen is-sharalar ótkizilýde. Sondaı sharanyń biri, búgingi elordamyz - Astananyń 20 jyldyǵy qarsańynda «Astana» dańǵylynyń saltanatty ashylýy bolyp otyr. Sonymen qatar, uly tulǵalarymyzdyń ulaǵatty eńbegi men erlikke toly eren  isterin áspetteý maqsatynda, ǵulama tarıhshy Qadyrǵalı Jalaırı dańǵyly, Eńbek Erleri Báıken Áshimov pen Zylıha Tamshybaevanyń qurmetine kóshe attary berildi», - dedi A. Batalov.

Oblystaǵy zııaly qaýym ókilderi, ardagerler, qala turǵyndary qatysqan saltanatty jıynda Taldyqorǵan qalalyq ardagerler keńesiniń tóraǵasy M. Halyq, Báıken Áshimovtiń uly O. Áshimov, Zylıha Tamshybaevanyń qyzy S. Toqsanbaıqyzy sóz alyp búgingi atqarylyp otyrǵan taǵylymdy iske rızashylyqtaryn jetkizip, kópshilikti Astana merekesimen quttyqtady.