Taldyqorǵanda áskerde jarasqan juptar kóbeıip keledi

TALDYQORǴAN. QazAqparat - Taldyqorǵan áskerı garnızony quramynda 10-ǵa jýyq áskerı bólim bolsa, Otan qorǵap júrip otbasy qurǵan áskerıler de az emes. Solardyń qatarynda aǵa leıtenant Tımýr Temirqul men efreıtor Albına Jumeke de bar, dep habarlaıdy QazAqparat tilshisi.

18/404 áskerı bóliminde tanysyp, shańyraq kótergeli jatqan bul jup desanttyq-shabýyldaýshy brıgadanyń medıtsınalyq rotasynda qyzmet etedi.

Aǵa leıtenant Tımýr Temirqul - Áýlıetadaǵy áskerılerdiń áýletinen shyqqan ofıtser.

Tımýrdyń atasy da, ákesi men anasy da, áskerı qyzmette bolǵan. Dástúrdi úzbeı ózi de medıtsınalyq kolledj ben áskerı ınstıtýt tamamdap, leıtenant shenin alyp, joldamamen úsh jyl buryn desantshy-shabýyldaýshylar brıgadasyna keldi.

Áskerı qyzmettegi abyroıly mindetin atqaryp júrip, jańadan jumysqa kelgen jas mamanmen kóńil jarastyrdy.

Temirdeı tártippen júrgen ofıtserdiń júregin boıjetken boıyndaǵy ózine tán erekshe qasıetterimen jaýlap alǵanyn aıtady komandır.

«Jumysqa degen óte joǵary jaýapkershiligi boldy. Qoıylǵan tapsyrmalardy buljytpaı oryndady. Ózine degen jáne maǵan degen kútimi, áıeldik kútimi qatty unady. Júregindegi ımandylyǵy meniń de júregimdi jaýlap aldy»,- dedi Tımýr Temirqul.

Albına Taldyqorǵan joǵary medıtsınalyq kolledjiniń túlegi. Eki jyl jedel járdem qyzmetinde feldsher bolyp, tájirbıe jınap, áskerı bólimge aýysqan.

Ómirlik serigin osy jerden kezdestirem dep oılaǵan da joq. Endi medbıke úshin áskerı tártip birinshi kezekte.

«Jumys tabaldyryǵyn attaǵannan keıin jumys ornynda biz tek áriptes retinde ǵana jumysymyzdy jasaımyz. Ol kisi meniń komandırim, maǵan buıryqtar beredi, tapsyrmalar beredi. Men sony jaýapkershilikpen buljytpaı oryndaımyn», - deıdi medbıke Albına Jumeke.

18404 áskerı bóliminde 1,5 myńǵa jýyq ofıtser men jaýynger qyzmet etedi.

Qazir jańa shaqyrylym aıaqtalyp, otan aldyndaǵy boryshyn ótegender úıine qaıtýǵa daıyndalyp jatyr.

Mundaǵy qyzmetkerlerdiń 15-20 paıyzy - erli-zaıyptylar eken.