Taldyqorǵanda Abaıdyń eskertkishi ashyldy

TALDYQORǴAN. QazAqparat - Búgin Ulystyń Uly kúninde Taldyqorǵan qalasynda Uly Abaıdyń eskertkishi ashyldy. Bul týraly QazAqparat Jetisý oblysy ákimdigine silteme jasap habarlaıdy.

Aqynnyń músini Taldyqorǵandaǵy Bıken Rımova atyndaǵy drama teatrynyń aldyna qoıyldy. Saltanatty sharaǵa oblys ákimi Beıbit Isabaev, Parlament Senatynyń birqatar depýtattary, Abaı oblysynan arnaıy ókilder, sol qatarda Qunanbaı qajynyń tikeleı urpaǵy Hýsman Verlıshev, sol sııaqty óner maıtalmandary, óńirdegi ardagerler, zııaly qaýym ókilderi, qala turǵyndary qatysty.

Eskertkishtiń ashylý saltanatynyń shymyldyǵy Muhtar Áýezovtiń «Abaı» qoıylymynyń úzindisimen ashyldy. Qoıylymda B.Rımova atyndaǵy drama teatrynyń áristerimen birge basty rólde Qazaqstannyń eńbek sińirgen qaıratkeri, belgili akter Bolat Ábdilmanov óner kórsetti.

Eskertkish resmı túrde ashylyp, aldyna gúl shoqtary qoıyldy.

Oblys ákimi Beıbit Isabaev jetisýlyqtardy aıtýly tarıhı jańalyqpen quttyqtap, Abaı eskertkishi ashylýynyń Naýryz merekesimen tuspa-tus kelýinde úlken sımvoldyq mán bar ekenin atap ótti. Sondaı-aq Memleket basshysy Qasym-Jomart Toqaev oblysqa kelgen saparynda Jetisý jerinde Abaı eskertkishin ornatýdyń oryndylyǵyna nazar aýdaryp, osy iske qozǵaý jasaǵanyn eske saldy.

«Qalalyq qoǵamdyq keńestiń sheshimimen eskertkishtiń Bıken Rımova atyndaǵy drama teatrynyń aldyna qoıylýy óner ordasynyń rýhyn odan saıyn bıiktete tústi. Abaıdyń sózimen aıtsaq, «Mal jutaıdy, óner jutamaıdy». Bul - rýhanııattyń ǵumyry máńgilik ekeniniń aıqyn aıǵaǵy. Osy ıgi sharanyń Naýryz merekesimen tuspa-tus kelýinde úlken mán bar. Naýryz tirshiliktiń nári, barsha ıgiliktiń qaınar kózi bolsa, Abaı – qazaq halqyna rýhanı serpilis ákelip, ulttyq sananyń jańǵyrýyna jolbasshy boldy. Sondyqtan osy eki qasterli qundylyǵymyzdyń bir-birimen astasýy, qýanyshtardyń qatar kelýi zańdy», - dedi B.Isabaev.

Aıta keteıik, eskertkishtiń tuǵyry granıt pen mramordan daıyndalǵan, músini qoladan quıylǵan. Tuǵyry 5,3 m, músini – 3,6 m. Eskertkishtiń sáýletshisi – Qazaqstan Respýblıkasynyń qurmetti qurylysshysy, uzaq jyl Sáýletshiler odaǵyn basqarǵan sáýletshi Aqmyrza Rústembekov. Músinshisi – Meıirlan Ázmaǵanbetov. Ol buǵan deıin Taldyqorǵandaǵy Súıinbaı Aronulynyń, Ǵalı Ormanovtyń, Nurǵısa Tilendıevtiń eskertkishterin, «Aıaly alaqan» kompozıtsııasyn jasaǵan.