Taldyqorǵanda 270 aqbókenniń múıizi tárkilendi
06:21, 07 Aqpan 2023
TALDYQORǴAN. QazAqparat - Taldyqorǵanda aqbóken múıizin satýǵa tyrysqan tórt adam ustaldy, - dep habarlaıdy QazAqparat tilshisi.
Kúdiktiler Ravon Nexia jáne Mazda kólikterimen júrgen. Ustaý kezinde úsheýi kólikterdiń birinde jasyrynýǵa tyrysqan.
Aqbókenniń 270 múıizi tárkilendi. Ustalǵandar 1982-2000 jyldary týǵan Almaty qalasy, Jambyl jáne Almaty oblystarynyń turǵyndary ekendigi anyqtaldy. Barlyǵy oblystyq polıtsııa departamentine túsinik berý úshin jetkizildi.
«QR QK-niń 339-babynyń 2-bóliminde «Ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý» kózdelgen tergeý amaldary bastaldy», - delingen Jetisý oblystyq polıtsııa departamenti baspasóz qyzmetiniń habarlamasynda.